Qeveria e Kosovës ka miratuar kërkesën e Ministrisë së Punëve të Jashtme për nisjen e procedurës për blerjen e objekteve për ambasadë në Zagreb të Kroacisë dhe Dakar të Senegalit.
Në mbledhjen e 109-të të mërkurën, kryeministri Albin Kurti ka thënë se ky hap do ta fuqizojë diplomacinë e Kosovës.
Ministrja e Punëve të Jashtme, Donika Gërvalla, e arsyetoi zgjedhjen për të blerë objekt të ambasadës në Senegal me faktin se nuk kanë buxhet më të madh për të zgjedhur një tjetër vend.
“Kjo zgjidhje lidhet me disa aspekte teknike. Mund të kishim bërë kërkesë për ndonjë ambasadë tjetër. Por siç thotë populli, ‘shtriji këmbët sa e ke jorganin’. Pra kaq na ka lejuar buxheti për sivjet dhe kemi zgjedhur Kroacinë dhe Senegalin”, ka thënë Gërvalla.
Pas fjalës së Gërvallës, kryeministri Albin Kurti e ka hedhur në votim këtë propozim, i cili është miratuar pa asnjë votë kundër apo abstenim.
