Me ndërmjetësimin e kryediplomatit të BE-së, Borrell, kryeministri i Kosovës, Albin Kurti, dhe presidenti i Serbisë, Aleksandar Vuçiq, u takuan të hënën për të diskutuar rreth targave të automjeteve në Kosovë – çështje kjo që ka rritur tensionet mes dy vendeve.
Pas takimit, Borrell ka thënë se edhe pse është biseduar rreth tetë nuk është arritur ndonjë marrëveshje.
“Fatkeqësisht ata nuk ranë dakord për një zgjidhje sot”.
Ai shtoi se është përgjegjësi urgjentishte e dy liderëve për të mos përshkallëzuar situatën.
“Të dy mbajnë përgjegjësi të plotë për dështimin e bisedimeve sot dhe për çdo përshkallëzim dhe dhunë që mund të ndodhë në terren. Ne parashtruam një propozim që presidenti Vuçiq e pranoi sot ndërsa kryeministri Kurti jo”, u shpreh ai.
Po ashtu Borrell thekoi se e kemi dhënë një propozim të cilin e ka pranuar Vuçiq, por e ka refuzuar Kurti.
“Presidenti Vuçiq dhe kryeministri Kurti, edhe pas 8 orësh diskutimesh, nuk kane arritur marrëveshje. Vuçiq e pranoi propozimin por Kurti jo. Ne presim që Kosova të suspendojë vendimin për targa”, ka theksuar Borrell.
Ai tutje ka thënë se presidenti i Serbisë, Aleksandar Vuçiq, e ka pranuar marrëveshjen që Serbia të mos e furnizojë veriun e Kosovës me targa KM.
Borrell ka theksuar se këtë kohë kriza është më e thellë.
“Që prej gushtit çështja e targave është vështirësuar. Kosova ka vendosur që prej sonte në mesnatë të fillojë gjobitjen e personave që nuk i kanë ndërruar tabelat. Shumë policë dhe komandantë serbë e kanë lënë detyrën e tyre për shkak të kësaj. Situata është shumë e brishtë. Ne kemi misionin e EULEX-it dhe KFOR-in, por ata nuk mund ta marrin përsipër rolin e policisë”, ka theksuar Borrell.
Sipas tij sundimi i ligjit nuk mund të merret si pretekst për tensionim të situatës.
“Sundimi i ligjit nuk duhet të merret si pretekst për eskalim të situatës dhe për tensione, kur nuk i respekton marrëveshjet e arritura vite më parë në dialog. Bashkimi Evropian dhe partnerët kanë bërë thirrje vazhdimisht për de-përshkallëzim të situatës. Ne jemi preokupuar prej kësaj vere me këtë çështje duke u munduar t’i shtyjmë afatet”, është shprehur Borrell.
Ai ka thënë se shpreson që të dyja palët do të punojnë për të evituar përshkaallësimin e mundshëm të situatës.
“Unë do ta mbajë dialogun lartë në agjendën time, me përkrahjen e përfaqësuesit special Miroslav Lajçak, të cilin dua ta përgëzojë për punën e tij, durimin, përkushtimin. Propozimi që kishim, e që ka marrë përkrahje të madhe nga Franca e Gjermania, mendoj se është mënyra e mundur për të dalë nga situata me perspektivë të normalizimit. Shpresoj që të dyja palët të evitojnë përshkallëzimin dhe krijimin e një krize të re”, ka thënë Borrell.
Ndryshe, takimi i sotëm në Bruksel ishte thirrur një ditë para nisjes së zbatimit të fazës së dytë të planit të Qeverisë, përkatësisht shqiptimit të gjobave prej 150 eurosh për shoferët me targa ilegale.
Shtetet e Bashkuara të Amerikës dhe Bashkimi Evropian, vazhdimisht i kanë kërkuar Qeverisë që të shtyjë afatin për riregjistrimin e veturave që kanë targa ilegale.
Kurti më 18 nëntor tha se Kosova është duke “bërë çmos për të ruajtur ligjshmërinë dhe kushtetutshmërinë e vendit tonë, nga njëra anë, dhe paqen e sigurinë, nga ana tjetër”.
“Unë jam optimist, por qasja e Beogradit ka qenë mjaft destruktive dhe në ditët në vijim do të shohim sa do të jemi të suksesshëm në këto negociata të reja”, kishte deklaruar Kurti.
