Garda Ceremoniale e FSK-së me 11 nëntor kishte marrë pjesë në ceremoninë e 104-vjetorit të përfundimit të Luftës së Parë Botërore, në varrezat e krishtera në Arbëri të Prishtinës.
Pas kësaj ceremonie që u organizua nga Ambasada Gjermane dhe ajo Franceze në Prishtinë, ku i pranishëm ishte edhe Ministri i Brendshëm, Xhelal Svecla, ushtarët e FSK-së u kritikuan nga politikanë të partive opozitare dhe portale të ndryshme, gjoja për “qëndrim gatitu në pllakën përkujtimore të ushtarëve të rënë serbë nga viti 1912-1918.”, duke tentuar kështu ta dëmtojnë imazhin e FSK-së e në veçanti të institucioneve të Kosovës.
Pas një kërkimi të shkurtë në google, KosovaNews, ka gjetur se e njëjta ceremoni, ishte organizuar edhe gjatë viteve të kaluara, kur në krye të shtetit ishin partitë tashmë opozitare.
Më 12 nëntor të vitit 2018, faqja zyrtare e ambasadës gjermane në Prishtinë, e kishte postuar ceremoninë e njëjte, ku kishte marrë pjesë edhe kryeministri i asaj kohe, Ramush Haradinaj.
Postimi i plotë i ambasadës gjermane në vitin 2018:
Por, e vërteta e kësaj ngjarjeje që mediat e caktuara qëllimshëm dhe tjerat në pa dashje, tentuan ta interpretojnë si qëllim i poshtërimit të Ushtrisë dhe dinjitetit kombëtar, identitetit shtetëror e historik, është krejtësisht ndryshe.
Në të njëjtin kuadrat të rrethuar me mur të ulët betoni ku nderohet lapidari që shënon fundin e Luftës së Parë Botërore, ku qëndruan gatitu ushtarët e FSK-së, ndodhet edhe një lapidar me ketë mbishkrim në çirilice sllave: “Këtu qëndrojnë eshtrat e ushtarëve të rënë serbë, që vdiqën në luftërat 1912-’18”.
Pra sipas kësaj, ushtarët e Kosovës dhe po ashtu ministri i brendshëm, Xhelal Sveçla, qëndruan pranë lapidarit që shënon fundin e Luftës së Parë Botërore, e jo në atë që u interpretua në media e nga politikanët opozitarë.
Lidhur me këtë rast, reagoi edhe Ministria e Mbrojtjes, ku e mohon qëndrimin e ushtrisë pranë lapidarit të serbëve duke e treguar të vërtetën.
Por skandali i mediave kosovare vazhdoj të thellohet kur, reagimin e Ministrisë e cilësonin si “fshehje” apo “gënjeshtër”.
E natyrisht se e gjitha kjo, më së shumti e kënaqi Serbinë dhe mediat e tyre.
“Homazhi që FSK-ja i bëri ushtrisë serbe shkaktoi indinjatë të madhe te disa politikanë shqiptarë,” – shkruajti mediumi i serbeve “KosovoOnline”.
Sipas këtij mediumi, pasi ushtarët serbë dhe ata francezë kishin hyrë në Prishtinë më 8 tetor 1918, e gjithë Prishtina thërriste “Rroftë Franca, Rroftë Serbia”./KosovaNews/
