Presidentja e Kosovës, Vjosa Osmani, njoftoi se sipas të gjitha gjasave, 18 dhjetori do të jetë data e zgjedhjeve të parakohshme në komunat veriore.
Ajo tha para mediave të hënën se për këtë datë u dakorduan edhe me subjektet politike që morën pjesë në takim.
“Sipas të gjitha gjasave do të jetë data 18 dhjetor, sapo t’i marrim mendimet për përgatitje të zgjedhjeve. Sipas të gjitha gjasave do të jetë data 18 dhjetor, sapo t’i marrim mendimet për përgatitje të zgjedhjeve. Janë ngritur në takim edhe shqetësimet tjera. Si presidente do të mundohem që qytetarëve të ju ofrohet siguri”, deklaroi Osmani.
Ajo shtoi se vendimi për shpalljen e zgjedhjeve do të merret sonte mbrëma, ose deri nesër në mëngjes.
Presidentja Osmani ka kërkuar përkrahjen ndërkombëtare që t’i monitorojë dhe të garantojë zgjedhje të lira në veri.
“Nuk është vendim që mund të ndryshohet pasi nuk ka rrugë tjetër, pasi përveç Ligjit për Zgjedhjet, është edhe një vendim i Gjykatës Kushtetuese që parasheh shpalljen e zgjedhjeve në situata të tilla. Institucionet tona të sigurisë do t’i marrin të gjitha masat që qytetarët tanë të ndihen të sigurt”, tha ajo.
