Kryetari i Aleancës për Ardhmërinë e Kosovës, Ramush Haradinaj, tha se mënyra e vetme për të arritur marrëveshjen finale, Shtetet e Bashkuara të Amerikës do duhej t’i mbyllte në një vend Kurtin dhe Vuçiqin, derisa të merreshin vesh mes vete.
Haradinaj më tej vlerësoi se Kurti tanimë është në rrugë të gabuar.
“Unë do i bëja thirrje Amerikës, në rast se ne nuk po dimë me dalë prej ku kemi hyrë, mos na lejoni më tutje me shku dëm. Na nxirrni prej ku kemi mbetur, mos na leni vetëm, mos na leni t’i vuajmë pasojat e kësaj. Mënyra e tyre do ishte me i thirrë udhëheqësinë e Kosovës dhe Serbisë, me i mbyllë diku derisa të merren vesh mes vete. Jemi në drejtim të gabuar, Kurti është në drejtim të gabuar”, deklaroi Haradinaj në tëvë1.
Duke u përgjigjur se nga çfarë mund të vie ngurtësia e Kurtit, Haradinaj tha se në këtë rast do donte ta ruante vetëm gjendjen, e madje të vepronte në drejtim të duhur.
“Unë e kam pyetur Kurtin për kë punon. Kjo pasi nuk besoj që Kurti si kryeministër nuk e din çfarë pasoja i sjellë Kosovës duke u ndarë nga Amerika në këtë fazë finale të procesit”, theksoi tutje ai.
Sipas tij, Kurti duhet të fokusohet tek marrëveshja me Serbinë si dhe në anëtarësimin e Kosovës në NATO.
“Besoj që nuk është në rregull të shkojë Kosova në zgjedhje, nuk është në rregull me ra kjo Qeveri, nuk ka nevojë me ra kjo Qeveri. Ne kemi një projekt mjaft të rëndësishëm para vetes, kjo është Qeveri e Kosovës ekzistuese. Duhet ta gjejnë guximin në vete, ta ndjejë përgjegjësinë që ka, që t’ia sjellë një marrëveshje me Serbinë që ka në përmbajtje njohjen dhe ta nisë Kosovën drejt NATO-s. Kjo është ajo që pret qytetari nga Kurti”, deklaroi Haradinaj në tëvë1.
Më tej, Haradinaj tha se Kurti nuk mund ta zgjedhë problemin e energjisë, pasi sipas tij, ai ka pasur politikat e gabuara në këtë drejtim.
“E dimë që Kurti politikat ekonomike i ka të këqija”, theksoi Haradinaj.
