Kryeministri Albin Kurti, ka folur për rëndësinë e të dhënave të popullsisë. Ai në hapjen e konferencës Javës së regjistrimit të popullsisë, ka thënë se ato paraqesin bazën e politikave për të ardhmen e një vendi.
“Regjistrimi i Popullsisë, ekonomive familjare dhe i banesave, përbën një prej ndërmarrjeve më të rëndësishme institucionale në vendin tonë. Të dhënat mbi madhësinë, përbërjen dhe shpërndarjen e popullsisë, kushtet e jetesës, e jetesës e niveli i edukimit, janë bilanci empirik i së tashmes dhe baza e politikave për të ardhmen”, është shprehur Kurti.
Sipas tij ato u mundësojnë të gjithë shfrytëzuesve të të dhënave e veçanërisht vendimmarrësve në nivelin lokal e qendror, orientimin dhe targetimin e politikave dhe shërbimeve më të mira për qytetarët.
“Të dhënat na ndihmojmë të sigurojmë nivel më të lartë të llogaridhënies dhe transparencës, ato janë pikë referuese për një planifikim më të gjatë dhe parashikimet e zhvillimeve të rëndësishme socio-ekonomike”, është shprehur Kurti.
Regjistrimi i ardhshëm i popullsisë do të zhvillohet nga 1 shtatori deri më 16 tetor 2023. Ky plan kohor sipas Kurtit, ofron mundësinë që secili qytetar të regjistrohet.
Java e Regjistrimit të Popullsisë në Kosovë që do të mbahet në datat 8-11 nëntor 2022. Gjatë kësaj jave do të diskutohet për rëndësinë e procesit të regjistrimit, metodologjinë e qasjet implementuese si dhe modelet dhe praktikat më të mira shtetërore.
