Këshilli Gjyqësor i Kosovës në takimin e jashtëzakonshëm të mbajtur sot, ku morën pjesë Kryetari i Gjykatës Supreme, Kryetari i Gjykatës së Apelit dhe nën Kryetari i Gjykatës Themelore në Mitrovicë, në prezencë të partnerëve ndërkombëtarë, diskutoi për mbarëvajtjen e punës në sistemin gjyqësor, posaçërisht në Gjykatën Themelore në Mitrovicë dhe degët e saj si dhe në Divizionin e Apelit pas dorëzimit të dorëheqjeve nga disa gjyqtarë dhe punonjës mbështetës të komunitetit serb.
“Këshilli ka kërkuar nga kryetarët e gjykatave dhe Drejtori i Përgjithshëm i Sekretariatit të KGJK-së që ta vlerësojnë gjendjen e krijuar dhe si autoritete kompetente në kuadër të gjykatave të tyre të ndërmarrin të gjitha masat e nevojshme dhe të paraqesin në Këshill propozimet e nevojshme për mirë funksionimin e punës në gjykata pa ndërprerje. Të njëjtit janë zotuar se puna në gjykata do të vazhdojë dhe njëkohësisht do të informohet Këshilli me raporte të veçanta për secilin rast”, thuhet në njoftimin e gjyqësorit.
Bëhet e ditur e këshilli nuk i ka shqyrtuar dorëheqjet e gjyqtarëve dhe të punonjësve mbështetës, pasi sipas tyre paraprakisht do të ketë raport vlerësimi nga autoritetet kompetente për përgjegjësinë e të gjitha subjekteve të përfshira në aktivitetet e fundit që ndërlidhen me situatën e krijuar.
“Këshilli mbetet i përkushtuar që të koordinojë veprimet me institucionet vendore dhe ndërkombëtare për garantimin e sundimit të ligjit dhe zbatimin e Kushtetutës dhe ligjeve të zbatueshme në Republikën e Kosovës. Këshilli kërkon nga Qeveria e Republikës së Kosovës dhe Policia që menjëherë të vlerësojnë situatën e sigurisë dhe të ofrojnë siguri për punonjësit dhe objektet në Mitrovicën Veriore, Zubin Potok dhe Leposaviq”, thuhet tutje në njoftim.
