Lista Serbe ka paralajmëruar se do të ketë përgjigje dhe rezistencë të ashpër ndaj gjobës së parë të moskonvertimit të targave nga KM në RKS. Reagimi i tyre vjen pas vendimit të Qeverisë së Kosovës të premten për zbatimin e vendimit për targat, që parashihet të zgjasë deri më 21 prill, i ndarë në fazë qortuese e gjobitëse.
Lista Serbe ka thënë se “u përcjellim edhe një herë qytetarëve tanë mesazhin e qartë të presidentit Aleksander Vuçiq se serbët në Kosovë dhe Metohi nuk janë vetëm dhe as shteti i Serbisë nuk do të lejojë persekutimin dhe dëbimin e popullit tonë”.
“Të gjithë ata që mendojnë se populli ynë do të vëzhgojë në heshtje heqjen e të drejtës tonë, d.m.th. heqjen e targave KM, lirinë e lëvizjes dhe rrezikimin e mbijetesës sonë, po mashtrohen rëndë”, thuhet tutje në reagimin e LS-së.
“Duke pasur parasysh planin e Albin Kurtit për të shqiptuar qortime dhe dënime të tjera ndaj serbëve që posedojnë targa legale dhe legjitime të lëshuara nga autoritetet e Republikës së Serbisë, në emër të popullit serb nga kjo zonë duam t’i themi atij qartë dhe pa mëdyshje se shqiptimi i masës së parë të gjobës do të jetë shkak për një përgjigje dhe rezistencë të ashpër nga populli serb, sepse jemi të vetëdijshëm për qëllimet e vërteta të pushtetarëve nga Prishtina”, vijon reagimin i tyre.
Sipas vendimit të Qeverisë nga një deri më 21 nëntor do të jetë masa e qortimit për serbët që nuk konvertojnë targat në RKS. Nga 21 nëntori deri më 21 janar do të jetë masa e gjobitjes prej 150 eurosh, dhe më pastaj nga 21 janari do të ketë targa provuese për dy muaj të tjerë, pas së cilës datë më 21 prill, nuk do të lejohen targa të tjera në territorin e Kosovës.
