Bashkimi Evropian pritet të ndajë 75 milionë euro si ndihmë të menjëhershme për Kosovën me qëllim të mbështetjes financiare të ekonomive familjare dhe bizneseve të prekura nga kriza ekonomike që tanimë e ka kapluar mbarë evropën.
Kështu ka bërë të ditur presidentja e Komisionit Evropian, Ursula Von der Leyen, e cila vizitoi Kosovën më 27 tetor, shkruan KosovaNews.
“Tani për tani keni nevojë për mbështetje të menjëhershme financiare kështu që ne do t’ju garantojmë 75 milionë euro për të mbështetur menjëherë bizneset dhe ekonomitë familjare. Të të gjitha procedurat e nevojshme do t’i finalizojmëderi në fund të vitit.”, tha Von der Leyen në një konferencë të përbashkët pas takimit me presidenten e Kosovës, Vjosa Osmani.
Evropa aktualisht po përballet me një krizë energjetike si pasojë e luftës së Rusisë në Ukrainë. Furnizimi me gaz për ngrohje, por edhe energji elektrike është paralajmëruar se do të vështirësohet gjatë këtij dimri.
Von der Leyen në deklaratën e saj, po ashtu tha se Kosova do të përfitojë nga diskutimet e BE-së blerjen e gazit
“Për ju është me rëndësi që të keni qasje në blerjen e gazit. E di që ndoshta s’është aq e rëndësishme për Kosovën, mirëpo duhet t’i bashkoheni përpjekjeve për blerjen e gazit ku do të përfitoni nda propozimet ligjore që i kemi në BE në lidhje me tavanin për çmimet e gazit por edhe në diskutimet për ndikimin e çmimeve të karburantit që ndikojnë në çmimet e elektricitetit.”, u shpreh ajo.
Presidentja e Kosovës, Vjosa Osmani, duke falënderuar BE-në për këtë mbështetje, tha se “është vendimtare që BE-ja të “na qëndrojë pranë dhe të na mbështesë me përballje me krizat, si ajo energjetike”
Lexo po ashtu:
Kosova siguron shumicën e furnizimit me energji elektrike përmes prodhimit të saj me qymyr. Nevoja për import të energjisë rritet gjatë dimrit, pasi kapacitetet vendore nuk mbulojnë nevojat për gjithë vendin.
Përveç mbështetjes së menjëhershme për krizën aktuale, Von der Leyen tha se pritet të ketë një investim tjetër prej 500 milionë eurosh për të gjithë rajonin e Ballkanit Perëndimor.
“Duam t’iu ndihmojmë në pavarësinë tuaj energjetike. Qasja jonë është se do të ofrojmë mbështetje të fortë për të ndërtuar kapacitete të reja, për të zëvendësuar qymyrin me energji të ripëritshme”, tha ajo.
Lexo po ashtu:
