Me iniciativë të presidentes Vjosa Osmani, në Prishtinë, sot për të dytën ditë me radhë, po vazhdon punimet Forumi për Gratë, Paqen dhe Sigurinë, i cili ka mbledhur mbi 400 pjesëmarrës.
Përgjatë dy ditëve sa do të zgjasë ky Forum, folës, panelistë e diskutues të tjerë do të debatojnë në temën bosht “Ndërtimi i Aleancave për Paqe të Qëndrueshme”.
E sot me fillimin e punimeve një fjalë rasti ka mbajtur ministrja e Punëve të Jashtme, Donika Gërvalla, e cila mes tjerash në kuadër të Forumit për Gratë, Paqen dhe Sigurinë, foli për ish-sekretaren amerikane, Madeleine Albright.
Ajo u shpreh se Albright ishte një prej njerëzve më të rëndësishëm për Kosovë.
“Albright ishte ajo që ndërroi rrjedhën e historisë, politikanja më e vendosur në botë në atë kohë. Mobilizimi i grave ka të bëjë me barazinë dhe cilësinë, sepse gratë sjellin një cilësi tjetër, shumë më të kërkuar në tavolinë”, u shpreh ajo.
Gërvalla u shpreh se Albright ishte e fuqishme dhe ajo mund të bënte ndryshimin, përcjell Klankosova.tv.
“Albright ishte më e mirë dhe më e fuqishme se shumë nga kolegët e saj, sepse ishte ndryshe mund të bënte ndryshimin. Gratë duan dhe gratë mund ta bëjnë diferencën. Gratë duhet të jenë edhe më të mira, të punojnë edhe më shumë për të qenë të suksesshme, mobilizimi i potencialit të grave ka të bëjë me barazinë”, u shpreh tutje ajo.
Panelistëve dje, në ditën e parë të Forumit për Gratë, Paqen dhe Sigurinë, u është drejtuar përmes një video-fjalimi edhe sekretari amerikan i Shtetit, Antony Blinken, i cili tha se forumi i organizuar nga presidentja Osmani bashkon dy gjëra që i kishte shumë për zemër sekretarja Madeleine Albright: popullin e Kosovës dhe fuqizimin e grave.
Ndërsa, presidentja Vjosa Osmani theksoi se nëse dëshirojmë të mirëmbajmë paqen, mund ta bëjmë vetëm nëse gratë janë në tavolinat vendimmarrëse. Presidentja u ka ndarë grave të Ukrainës, Çmimin Presidencial të Meritave./KosovaNews/
