Kryeministri Albin Kurti ka deklaruar se nuk janë as dy vjet kohë që Kosova dhe Serbia duhet të arrijnë një marrëveshje nën ndërmjetësimin e Bashkimit Europian.
Në një intervistë për “DW”, kur u pyet për deklaratën e emisarit të BE-së, Mirslav Lajçak, i cili tha se “dritarja e mundësisë” për Kosovën dhe Serbinë është deri në vitin 2024.
“A e merrni këtë tërheqje të vërejtjes seriozisht?”, ishte pyetja drejtuar Kurtit, i cili u përgjigj se është i gatshëm për angazhim “kreativ” në bisedime me Serbinë.
“Pajtohem se nuk kemi shumë kohë dhe se ne jetojmë në kohëra jo vetëm të rrezikshme, por edhe të paparashikueshme. Prandaj, nuk jam i sigurt as që i kemi dy vjet kohë. Duhet që sa më shpejt ta bëjmë atë. Për këtë, jam gati të angazhohem kreativisht dhe konstruktivisht në këto bisedime në Bruksel kurdo që të na ftojnë”, tha Kurti.
Të enjten në Prishtinë, Lajçak tha se Kosova dhe Serbia nuk duhet të shpërdorojnë mundësinë e arritjes së një marrëveshjeje për normalizimin e marrëdhënieve ndërmjet tyre para zgjedhjeve në SHBA dhe BE në vitin 2024.
“Nuk jemi të shpërqendruar nga zgjedhjet dhe kemi aleancë unike të Bashkimit Evropian dhe Shteteve të Bashkuara, mbështetje të fortë nga Mbretëria e Bashkuar, të gjithë janë të përqendruar në dialog dhe të gjithë presin që dialogu të prodhojë normalizim. Nuk do të thosha që viti tjetër është vendimtar, por e kam thënë më shumë se një herë se e kemi këtë dritare mundësie që do të zgjasë deri në zgjedhjet europiane dhe amerikane në vitin 2024. Mendoj që është përgjegjësia jonë që të mos e shpërdorojmë këtë mundësi”, ka thënë Lajçak.
Për të dërguar mesazhet e njëjta dhe për të diskutuar për të njëjtat çështje që i foli me Kurtin në Prishtinë, Lajçak të hënën do të udhëtojë drejt Beogradit.
