Tri ditë më parë ministri i Bujqësisë, Faton Peci, ka folur për uzurpimin e pronave. Ai denoncoi ndërtimin e 25 villave në Stankaj të Pejës, të cilat sipas tij janë ndërtuar kundërligjshëm në Prona të Institutit Bujqësor të Kosovës, ndërsa paraqiti edhe keqpërdorimet më objektet në Prishtinë.
Ndër të tjerash ai përmendi edhe një pronë në Ulpianë që është e Ministrisë së Bujqësisë që sipas tij është “uzurupuar dhe tjetërsuar nga individë që nuk janë kontrolluar asnjëherë nga institucionet e thirrura”.
“Është pa-pranueshme se si para syve të institucioneve qendrore e lokale, ne zemër të Prishtinës, në Ulpianë ështe zhvatur prona e Ministrisë së Bujqësisë duke lejuar apo duke mbyllur sytë karshi: Ndërtimeve të jashtëligjshme dhe ndërtimeve të vrazhda pa asnjë pasojë nga organet relevante të thirrura për ndalimin e ndërtimeve pa leje; uzurpim dhe tjetërsim i pronës publike të Ministrisë nga individë që nuk janë kontrolluar asnjëherë nga institucionet e thirrura për ta realizuar një gjë të tillë; tejkalim në objekte banimi dhe lokale afariste; Operatorët ekonomikë / palë të treta në këtë lëmsh të krijuar, paguajnë qira për objektet e tyre afariste mirëpo jo titullarit faktit të pronës”, ka shkruar mes tjerash ministri Peci.
Lidhur me këtë çështje, Prokuroria Themelore në Prishtinë ka autorizuar Policinë e Kosovës në ndërmarrjen e veprimeve të nevojshme për grumbullimin e informatave dhe provave lidhur me këtë çështje.
Kështu ka thënë zëdhënësja e Prokurorisë, Laureta Ulaj.
“Prokuroria Themelore në Prishtinë ka autorizuar policinë në ndërmarrjen e veprimeve të nevojshme për grumbullimin e informatave dhe provave lidhur me këtë çështje”, tha Ulaj.
Për shkak të këtyre denoncimeve, Peci tanimë ndodhet nën mbrojtje të afërt të Policisë së Kosovës.
