Kryeministri i Kosovës, Albin Kurti gjatë adresimit në Seminarin e 102-të të Rose-Roth të Asamblesë Parlamentare të NATO-së, ka thënë se synimi i Kosovës është që të forcohet e të bëhet anëtare e NATO-s dhe të kontribuojë në promovimin e vlerave demokratike e paqes nëpër botë.
Kurti ka thënë se këtë vit buxheti për mbrojtje është rritur në 102 milionë euro, ndërsa synimi është që së shpejti të arrihet në 2 për qind të bruto produktit vendor buxheti për mbrojtje.
Ai ka folur për bashkëpunimin me partnerët, si në strehimin e refugjatëve nga Afganistani, por edhe në misione të FSK-së jashtë vendit.
Ndërkohë në pyetjen nëse Serbia po synon ta imponojë mënyrën e vetë të jetesës, Kurti ka thënë se mendon se është e kundërta.
“Serbia preferon territorin e të tjerëve, por pa të tjerët në të. Nuk kemi të bëjmë me mënyrë jetese, e çështje kulturore apo fetare. Por, me ide tipike ekspansioniste të dominimit të këtij rajoni të Evropës. Natyrisht duke llogaritur këtu ndihmën e Rusisë”, ka thënë Kurti.
Ai ka përmendur lidhjen e ngushtë të Serbisë me Rusinë, si dhe bazat që Serbia i ka në kufi me Kosovën.
Kurti ka thënë se Kosova ndonëse nuk është në NATO, e ka NATO-n pjesë të saj.
Kurti është pyetur edhe për liberalizimin e vizave, ai ka thënë se është çështje që është vonuar për shkak të hezitimit të disa shteteve anëtare, porse Kosova ka plotësuar 95 kritere, mbi 2.5 herë më tepër kritere sesa vendet e tjera të rajonit.
“Ne nuk kemi alternativa tjera, pos BE-së dhe NATO-s”, ka thënë Kurti, që ka thënë se liberalizimi i vizave është çështje që duhet miratuar në një të ardhme shumë të afërt.
Ai po ashtu ka thënë se është në përfitim të BE-së inkuadrimi i gjashtë shteteve të Ballkanit Perëndimor.
