Ministrja e Arsimit, Arbërie Nagavci, ka thënë se ligji e përcakton se nuk do të ketë paga për ata që nuk punojnë.
Në një deklaratë në “Context”, në ATV, ministrja ka shtuar se SBASHK-u i ka lënë në baltë anëtarët e vet me papërgjegjësinë e tyre.
“Është definitive që ligji për greva neni 18 e përcakton qartë se mospunë nuk ka pagesë dhe është e vërtetë që ne këtë e kemi diskutuar më shumë se një herë me kryesinë e SBASHK-ut duke u siguruar që të përcjellin mesazhin te mësimdhënësit, në mënyrë që vendimet t’i marrin të bazuara në argumente”, ka thënë Nagavci.
Ministrja Nagavci gjithashtu ka shtuar se orët e humbura do të kompensohen dhe se kanë rishikuar kalendarin.
“Në një situatë të tillë, ku për fat të keq kemi një kryesi të Sindikatës së Arsimit që i la në baltë të gjithë anëtarët e vet me një papërgjegjësi të plotë dhe madje edhe në këtë situatë kur do të duhej të ishin në diskutime për të parë se a mund të realizohet ndonjë gjë ata vazhdojnë me kërcënime se nuk do të kompensohen orët. Si qeveri jemi në dijeni për gjendjen socjo-ekonomike dhe për inflacionin si dhe jemi të vetëdijshëm për ligjet në fuqi dhe orët e humbura duhet të zëvendësohen”, shtoi ministrja e Arsimit.
Kujtojmë se sot ishte dita e fundit që sipas ligjit do të duhej të ekzekutoheshin pagat për mësimdhënësit.
