Kryetari i Bashkimit të Sindikatave të Pavarura të Kosovës (BSPK), Atdhe Hykolli ka konfirmua se greva në sektorin publik të Kosovës tashmë është pezulluar dhe gjithë ata sektorë që nga 25 gushti nuk kanë funksionuar si duhet, tani i kthehen punës normale.
Kreu i BSPK-së, Atdhe Hykolli, tha për KosovaNews veprimi sindikal që nisi më 25 gusht tashmë është pezulluar.
“Po ju konfirmoj se greva është pezulluar. Të gjithë sektorët tashmë kthehen në punë normale, si në nivelin qendror ashtu edhe në atë lokal. Greva është pezulluar deri në janar të vitit të ardhshëm”, tha Hylolli.
Ai shtoi se së shpejti BSPK-ja do të lëshojë edhe një komunikatë për media, ku do të jepën detaje e duhura vendimin që të pezullohet greva.
Ndërkohë mëngjesin e së hënës numër i madh i qytetarëve ia kanë mësyrë komunës së Prishtinës për t’u pajisur me dokumente.
Pas grevës një muajshe të shpallur nga BSPK-ja të gjitha shërbimet në komunë mund të kryhen vetëm nga dita e sotme.
Greva në arsim dhe në administratën publike në nivelin lokal dhe qendror, nisi më 25 gusht.
Deri te pezullimi i grevës u tha se erdh pas votimit të anëtarësive të sindikalistëve. Në sindikatën e arsimit, 54.88 për qind e anëtarësisë ka votuar për pezullimin e grevës deri në janar.
Për shkak të grevës, për gati pesë javë, mbi 300.000 nxënës mbetën jashtë bankave shkollore.
Sindikalistët kërkuan 100 euro për punëtorë për çdo muaj deri në hyrjen në fuqi të Ligjit për paga.
Por, Qeveria publikoi një pako për ndihmë për shkak të rritjes së inflacionit dhe në të u parapa 50 euro për të gjithë punëtorët e sektorit publik.
Qeveria së fundmi ka hartuar Projektligjin për paga dhe i njëjti është në procedura të konsultimeve publike. Ai më pas duhet të miratohet në Qeveri dhe Kuvend, e më pas të publikohet në Gazetën Zyrtare. Tetë muaj pas publikimit në Gazetën Zyrtare, legjislacioni ky legjislacion pritet të hyjë në fuqi./KosovaNews/
