Ministri i Kulturës, Rinisë dhe Sportit, Hajrulla Çeku, bashkë me kryeministrin e Kosovës, Albin Kurti, dhe ministrin e Administrimit të Pushtetit Lokal, Elbert Krasniqi, kanë vizituar monumentet e trashëgimisë kulturore në Pejë, Deçan dhe Gjakovë.
Çeku ka thënë se Qeveria e Kosovës ka plan ambicioz për trashëgminë kulturore.
“Këtë të diel, bashkë me Kryeminstrin Albin Kurti i vizituam monumentet e trashëgimisë kulturore në Pejë, Deçan e Gjakovë, për t’i parë nga afër punët restauruese të Ministrisë së Kulturës. Kulla e Sheremetit në Pejë, Kulla e Tahirsylajve në Isniq të Deçanit, Muzeu etnografik e Hani i Haraqisë në Gjakovë janë disa nga asetet ku punimet janë në fazën përfundimtare”, ka shkruar ai në Facebook.
“Kujdesi ndaj historisë sonë dhe shfrytëzimi i potencialit socio-ekonomik janë arsyet themelore të investimeve në këto asete. Qeveria e Kosovës ka plan ambicioz për trashëgiminë kulturore. Gjatë 18 muajve të qeverisjes, dhjetëra monumente janë shpëtuar nga shkatërrimi dhe shumë prej tyre po rifunksionalizohen përmes ndërhyrjeve emergjente dhe atyre restauruese”, përfundon postimi.
