Ministria e Mbrojtjes së Republikës së Kosovës ka njoftuar edhe për arritjen e një suksesi tjetër të FSK-së, e cila është prezantuar nga një institucion me rëndësi i Bashkimit Evropian, e ku thuhet se Kosova është shembull për kërkim-shpëtim.
Rrjeti i Njohurive për Mbrojtjen Civile të Unionit që vepron në kuadër të Drejtorisë së Përgjithshme për Mbrojtjen Civile Evropiane dhe Operacionet e Ndihmës Humanitare (DG ECHO) të Bashkimit Evropian prezantoi Qendrën Ndërkombëtare të Trajnimit të Kërkimit dhe Shpëtimit (SARITC) të FSK-së në Pomozatin.
Në një artikull të titulluar ‘Ndërtimi i trajnimeve për kërkim-shpëtim në Kosovë’ ata përshkruajnë në detaje punën dhe infrastrukturën e Qendrës.
Veçanërisht ata u fokusuan në vizionin ambicioz dhe të ardhmen e Qendrës Ndërkombëtare të Trajnimit në Kërkim-Shpëtim e FSK-së (SARITC).
Kurse në fjalinë përfundimtare të artikullit thuhet “Nëse dëshironi një përvojë trajnimi unik, sfidues dhe tërësisht të këndshëm, vizitoni Kosovën.”
“Shumë punë dhe përpjekje u bënë në procesin e prezantimit nga Rrjeti i Njohurive për Mbrojtjen Civile të Unionit. Rezultati është burim i madh krenarie dhe arritjesh për SARITC-në, FSK-në dhe Kosovën. Vazhdojmë tutje drejtë sukseseve të reja!”, thuhet nga Ministria e Mbrojtjes së Kosovës./KosovaNews/
