Tashmë defekti që ka shkaktuar rrufeja është zgjidhur dhe minatorët e mbetur të bllokuar në minierën e Stantërgut, kanë nisur të dalin mbi sipërfaqe.
Për më shumë se pesë orë ata kanë mbetur të bllokuar, shkaku i një defekti në rrjetin e energjisë elektrike, jashtë minierës.
Gani Osmani, kryetar i Sindikatës së Minatorëve, deklaroi se rryma është rikthyer dhe brenda pak minutave pritet të dalin nga miniera të 127 minatorët që kanë mbetur të ngujuar.
E kryeshefi i Trepçës, Enis Abdurrahmani, ka deklaruar se gjendja e minatorëve është e mirë.
Ndërkohë, drejtori i Trepçës, Behxhet Vinarci, në një deklarim për media konfirmoi se avaria me rrymë ka ndodhur rreth orës 11:30.
Sipas tij, pas përkeqësimit të motit, rrufeja ka goditur dy shtylla në afërsi të minierës duke bërë që të ndërpritet furnizimi me energji elektrike të ashensorëve.
Ai tha se për këtë arsye, minatorët ka në mbetur të ngujuar, kurse ekipet e KEDS-it kanë dalë në vendin e ngjarjes dhe kanë sanuar defektin.
