Kritikave të kreut të LDK-së, Lumir Abdixhiku për grevën dhe situatën e përgjithshme në vend në adresë të Qeverisë iu është kundërpërgjigjur deputeti nga radhët e Lëvizjes Vetëvendosje, Salih Zyba, i cili ka thënë se është vetë Abdixhiku që ka tregu se si PAN-i di t’i përdorë grevat si instrument politik.
Reagimi i deputetit Zyba erdhi pasi që kreu i LDK-së, Abdixhiku ka kritikuar shkuarjen e kryeministrit, Albin Kurti në Japoni në kohën kur nxënësit kanë mbetur në shtëpi, duke e cilësuar këtë si paaftësi dhe papërgjegjësi.
“Mbi 320 mijë fëmijë tash e një muaj janë pa mësim – rrinë në shtëpi – por Kryeministri i Kosovës zgjedhë të largohet për në Japoni. Paaftësi dhe papërgjegjësi! Ky njeri nuk di të qeverisë! Asnjëherë në Kosovë, në kohë paqeje, mësimi nuk është ndërprerë kaq gjatë. Asnjëherë më parë fëmijët kosovarë nuk kanë pësuar me kaq pandjeshmëri. Kjo më nuk është gjendje normale. Fëmijët, familjet, mësimdhënësit e vet shteti s’mund të dëmtohen me kaq lehtësi. Kujt i duhen fajësimet, ofendimet e egot individuale kur në fund mbesim në krizë? Kosova ka nevojë për vëmendje e udhëheqje të matur politike. Kosova ka nevojë për lidership që jep zgjidhje, menaxhon kriza e përgatitë vendin për betejat e madha përpara – në energjetike, inflacion, shëndetësi e ekonomi. Ikja nga këto ballafaqime është veç papërgjegjësi”, ka shkruar Abdixhiku.
Mirëpo argumentin se greva po përdoret edhe tash si instrument poilitik ia ka kujtuar deputeti Zyba.
“Lumiri në 2019 na ka tregu se si PAN-i di t’i përdorë grevat si instrument politik, madje dhe kundër partnerëve të koalicionit. E kur atë e kanë bërë kundër atyre me të cilët e kanë ndarë tallin, natyrisht që e bëjnë edhe sot, sidomos ndaj qeverisë që ua kanë ndalë tallin”, ka shkruar Zyba, ndërsa ka shkëputur një pejsë të deklaratës që kishte dhënë Abdixhiku më 2 shkurt 2019.
Greva e përgjithshme në sektorin publik ka nisur më 25 gusht. Që atëherë shkollat vazhdojnë të jenë të mbyllura për shkak të mosarritjes së ndonjë marrëveshjeje midis Këshillit Grevist dhe Qeverisë së Kosovës.
Punonjësit e sektorit publik po kërkojnë ndër të tjera 100 euro shtesë në paga deri në miratimin e Ligjit për Paga, derisa Qeveria ua ka ofruar 50 euro shtesë deri në fund të këtij viti fiskal.
E pakënaqësitë me zgjatjen e grevës së organizuar nga SBAShK-ut vetëm sa po rriten. Deri sa një pjesë e shkollave pas votimeve të fshehta kanë vendosur të nisin procesin mësimor, në ato shkolla ku ende po mbahet greva, prindërit po organizojnë protesta, raporton KosovaNews.
