Bashkimi Evropian ka shprehur shqetësimin për forcimin e raporteve midis Serbisë dhe Rusisë, pasi këto dy shtete nënshkruan një marrëveshje për bashkëpunim në sferën e politikës së jashtme.
Zëdhënësi i BE-së për politikë të jashtme dhe siguri, Peter Stano, tha se kjo marrëveshje erdhi në kohën kur Rusia po vazhdon agresionin ndaj Ukrainës dhe çdo ditë “po e shkel të drejtën ndërkombëtare, forcat e saj po kryejnë krime ndaj civilëve e në pjesë të okupuara [të Ukrainës] po organizon referendume ilegale”.
“Nëse në këto rrethana shohim se ministri i Jashtëm i Serbisë nënshkruan marrëveshje, me të cilën pajtohet për konsultime me shtetin që kryen akte të tilla, atëherë kjo është shenjë se Serbia po i forcon raportet me Rusinë. Dhe kjo ngreh shqetësime serioze. Raportet me Rusinë në këtë nuk mund të jenë sikur asgjë të mos kishte ndodhur. Këto ne i marrim shumë seriozisht”, tha Stano.
Kurse ambasadori i ShBA-së në Beograd, Christopher Hill, ka thënë të hënën, se Serbia duhet të shpjegojë se çfarë firmosi me Rusinë ditë më parë në New York, kur u mbajt sesioni i 77-të i Asamblesë së Përgjithshme të OKB-së.
Serbia u arsyetua se bëhet fjalë për “marrëveshje teknike” dhe se kjo nuk ka të bëjë me sigurinë, por titulli i marrëveshjes është “koordinim i politikave të jashtme të dy vendeve”.
Hill tha se ShBA-ja pret shpjegim nga Serbia për këtë marrëveshje në kohen kur me Rusinë askush nuk po firmos marrëveshje, pos siç ka thënë ai “rekrutët e varfër”, duke iu referuar urdhrit për mobilizim.
“Në këtë moment, askush nuk duhet të nënshkruajë asgjë me Rusinë dhe shumë pak po e bëjnë. Përveç atyre rekrutëve të varfër që po mobilizohen për të shkuar në luftë. Është e vështirë për ne ta kuptojmë, por duam të dëgjojmë një shpjegim se për çfarë bëhet fjalë”, tha Hill, përcjell mediumi i pavarur serb N1 të hënën.
Marrëveshja Serbi – Rusi nxiti reagime të mëdha edhe në Bruksel. Disa eurodeputetë kërkuan ndërprerjen e negociatave me Serbinë për anëtarësim në BE pas kësaj marrëveshje.
Serbia është ndër vendet e vetme në Evropë që ka refuzuar t’i vë sanksione Rusisë për agresionin që po bën në Ukrainë.
