17:10 – Munishi për dhunimin e 11 vjeçares: U lirua nga strehimorja me kërkesë të familjes
Kryeprokurori i Prokurorisë Themelore të Prishtinës, Kujtim Munishi ka folur për herë të parë për rastin e dhunimit të 11-vjeçares para Komisionit për të Drejtat e Njeriut, Barazi Gjinore, për Persona të Pagjetur dhe Peticione.
Deputeti i Lëvizjes Vetëvendosje, Alban Bajrami ka kërkuar llogari nga Munishi për çështjen e lirimit të 11 vjeçares nga strehimorja.
“Vajza është kthy në shpi. Personat që e kanë dhunu e kanë taku prapë mbase. A mund të vërtetoni se pasi që është dhunu, u kthy në shpi, vetë thatë që e keni pranu kërkesën e familjarëve që me kthy në shpi. A mundeni me na siguru që si ka taku dhunuesit e vet në rrugë, tu shku në market?”- i është drejtuar Bajrami.
Munishi në kundërpërgjigjen e tij ka thënë se pyetja e Bajramit ka adresë të gabuar, duke shtuar se prindërit e vajzës kanë kërkuar që e njëjta të kthehet në shtëpi.
“Pyetja e adresuar gabimisht. Të tregova, më 21 korrik me kërkesë të familjes është liru. Kërkesa e prokurorit ka qenë që e njëjta të qëndroj në strehimore për shkak të rrezikshmërisë. Prindërit kanë kërku”- ka thënë Munishi.
“Në momentin kur është paraqit kërkesa, ka garantu familja. Ne nuk kemi të drejtë me kundërshtu familjen”- shtoi ai.
Ndërsa kreu i Këshillit Gjyqësor i Kosovës, Albert Zogaj ka thënë se nuk është kompetencë e gjykatës apo prokurorisë që të bëjnë kërkesë të hiqet e drejta prindërore. Për këtë çështje, Zogaj ka thënë se është Qendra për Punë Sociale.
13:47 – Munishi për rastin e 11-vjeçares: E papranueshme të jepet gjykim pa e pyetur Prokurorinë
Prokurori i shtetit, Kujtim Munishi, duke treguar kronologjinë e ngjarjes për dhunimin e 11-vjeçares ka akuzuar mediat për gjera të pavërteta.
“Është e padrejtë, ka qenë shumë joprofesionale, joligjore të jepet një gjykim jo i drejtë pa i parë shkresat e lëndës. Kjo ndodhë kur mediat japin informacione të pavërteta për prokurorinë” ka thënë ai.
Ai ka thënë se nëse është bërë diçka që nuk duhet, do të japin dorëheqje. Ka shtuar se është e papranueshme kërkimi i dorëheqjes dhe ndërhyrja në institucionet e drejtësisë pa i parë shkresat e lëndës së Prokurorisë.
Munishi e ka pyetur deputeten, Tinka Kurti se cila arsyeja ligjore për kërkimin e dorëheqjes.
Ajo ka thënë se 11-vjeçarja është dhunuar dy herë prandaj edhe ka ardhur si kërkesë.
Munishi e ka quajtur të gabueshme kërkesën e Kurtit dhe tendencioze.
“Ju jeni ne pushtet, dhe e dini se me çfarë kushte punojnë qendrat sociale dhe strehimoret”, ka thënë ai.
10:49 – Munishi për rastin e 11-vjeçares: E papranueshme të jepet gjykim pa e pyetur Prokurorinë
Prokurori i shtetit, Kujtim Munishi ka thënë se që nga momenti që e ka marrë detyrën, çdo lëndë po trajtohet me prioritet.
Ai ka thënë se kanë themeluar Departamentin për dhunë në familje që ka 5 prokurorë.
Duke folur për rastin e dhunimit të 11-vjeçares ai ka thënë se ka qenë e papranueshme të jepet gjykim pa e pyetur Prokurorinë.
“Kemi departamentin për të mitur. Secili rast me të mitur ka prioritet, ne i marrim të gjitha rastet. Sa i përket rastit 11-vjecares ka qenë e papranueshme dhe jo etike që të jepet një gjykim pa e pyetur prokurorinë. Ne i kemi marr të gjitha masat dhe të gjitha veprimet”, ka thënë ai.
10:27 – Zogaj: Sistemi gjyqësor ka nevojë për më shumë resurse
Kryesuesi i Këshillit Gjyqësor të Kosovës, Albert Zogaj, është duke raportuar në Komisionin për të Drejtat e Njeriut për rastin e dhunimit të një 11-vjeçareje.
Zogaj ka thënë se sistemi gjyqësor ka dy probleme, efikasitetin dhe cilësinë.
Ai tutje ka thënë se vazhdimisht kanë potencuar se u duhen më shumë resurse dhe se cilësia në sistemin gjyqësor është pasojë e shumë viteve më herët.
Tutje sipas Zogajt problem vazhdon të mbetet politika ndëshkimore.
