Kryetari aktual i Prishtinës, Përparim Rama, i cili erdhi në pushtet me 206 premtime dhe realizimin e projekteve madhore prej dhjetëra miliona euro, ende nuk ka nisur asgjë të tillë.
Përkundër kësaj, Rama po hap tenderë e po planifikon të jep qindra mijëra euro për ndërtimin e mbikalimeve, të cilat më parë kanë qenë kritikuar si investime të kota dhe me pamje të shëmtuara në kryeqytet.
Tash së fundi Komuna e Prishtinës ka hapur tender, i cili është publikuar sot dhe po i jep 500 mijë euro për ndërtimin e tri mbikalime të përkohshme në ‘Aktash’, ‘Lakrishtë’ dhe ‘Arbëri’, raporton KosovaNews.
Sipas njoftimit, afatet kohore për përfundim të këtij tenderi janë 120 ditë nga dhënia e tij.
Sipas detajeve në dosjen e tenderit, operatori ekonomik duhet të ofrojë dëshmi se ka përfunduar me sukses kontrata për punë të ngjashme, në vlerë minimale prej 700,000.00 euro në 3 vitet e fundit.
Po ashtu, për kryerje të këtyre punëve, operatori ekonomik duhet të angazhoj personelin profesional të cilët duhet të kenë kualifikimet shkollore si: Menaxheri i projektit inxhinier i diplomuar i ndërtimit (drejtimi konstruktiv) – 5 vite përvojë pune pas diplomimit, udhëheqës i punishtes -Inxhinier i dip.i ndërtimtarisë , drejtimi konstruktiv – 3 vite përvojë pune pas diplomimit, Një inxh.i gjeodezisë (inxhinier ose bachelor) drejtimi gjeodezisë – 3 vite përvojë pune pas diplomimit, dy teknik drejtimi- ndërtimtari dhe një teknik drejtimi i makinerisë.
Mes tjerash në dosje të tenderit thuhet se operatori ekonomik duhet të ofroj dëshmi të kënaqshme Autoritetit Konktraktues (Komunës) se qarkullimi bankar, gjatë tri viteve të fundit ka qenë jo më pak se 900,000.00 euro.
Kurse kriter për dhënie të këtij tenderi prej 500 mijë euro është operatori ekonomik që ofron çmimin më të ulët.
Kujtojmë se kryetari i Komunës së Prishtinës, Përparim Rama i ka dhënë 206 premtime në fushatën zgjedhore të vitit 2021 për kryetar të kryeqytetit.
Prej gjithë këtyre premtimeve, sipas raportit GAP-it që është publikuar pak ditë më parë, Rama vetëm shtatë premtime i ka realizuar, ndërsa i kanë mbetur edhe 199 tjera për t’i përmbushur.
