Ndonëse është dita e 24-të e grevës dhe drejtuesit e SBASHK-ut nuk po lëshojnë pe dhe po mbajnë gjithë sistemin arsimor të bllokuar, janë disa shkolla në qytete të ndryshme të vendit që po thyejnë grevën dhe e kanë filluar vitin e ri shkollor.
Pas komunës së Gjakovës dhe asaj të Podujevës, ku disa shkolla nisën mësimin, tani edhe në komunën e Fushë-Kosovës ka nisur të thyhet greva, raporton KosovaNews.
Është Gjimnazi “Hivzi Sulejmani”, që ka paralajmëruar se do të nis mësimin nga dita e hënë më 19 shtator.
Në një njoftim për media thuhet se pas diskutimeve e shqyrtimit të situatës, sot Këshilli i Arsimtarëve erdhi deri te vendimi, për të nisur procesin mësimor.
“Me qëllimin e vetëm për të mirën e nxënësve, mësimdhënësve, prindërve, rrethit shoqëror dhe shtetit të Kosovës, Këshilli i Arsimtarëve vendosi që nga data 19.09.2022 (e hënë) në Gjimnazin ” Hivzi Sulejmani” në Fushë – Kosovë të filloj procesi i rregullt mësimor për vitin shkollor 2022/23. Me respekt: Këshilli i Prindërve të shkollës, Këshilli i Nxënësve të shkollës, Këshilli i Arsimtarëve dhe drejtori i shkollës. Urime dhe na priftë e mbara se bashku!”, thuhet në njoftimin e dhënë.
Kujtojmë se në komunën e Podujevës të gjitha shkollat fillore e kanë nisur pjesërisht mësimin.
Ndërkaq, në shkollat profesionale “Fan S.Noli” dhe “Isa Boletini” janë duke punuar me numër më të vogël të profesorëve, kurse në gjimnazin “Aleksander Xhuvani” mësimi nuk ka filluar.
Këtë e bëri të ditur dje, Avni Fetahu, drejtor i Arsimit në këtë komunë.
“Shkollat fillore janë duke punuar me një numër të vogël të mësuesve deri në dy apo tre, si dhe me nga 30 apo 40 nxënës. Ndërsa, arsimtarët nga klasa e gjashtë deri në të nëntën kanë një hezitim në lëndë të caktuara”.
“Në gjimnaz kishte nxënës por asnjë profesor nuk e zhvilloi mësimin, ndërsa në shkollat profesionale ka nxënës më pak por janë deri 10 deri në 11 profesorë që punojnë”, ka thënë Fetahu.
Kurse janë pesë shkolla në komunën e Gjakovës që kanë nisur nga sot procesin mësimor.
Kështu është njoftuar zyrtarisht Drejtoria e Arsimit në këtë komunë, por edhe nga vetë shkollat nëpër faqet e tyre zyrtare.
Shkollat që kanë dalë me këtë vendim janë: shkolla fillore “Mustafa Bakija”, shkolla “Fan. S. Noli” në Dujakë, shkolla “Emin Duraku”, “Fehmi Agani” dhe shkolla “Yll Morina”.
“Drejtoria e Arsimit në komunën e Gjakovës është informuar zyrtarisht nga drejtorët e pesë shkollave se mësimi fillon sot, më 15 shtator. Shkolla fillore ‘Mustafa Bakija’, ‘Fehmi Agani’ cikli i ulët, ‘Emin Duraku’ cikli i ulët, ‘Yll Morina’ pjesërisht dhe ‘Fan S.Noli”, thuhet në njoftim.
