Gjatë ditës së djeshme publiku u trondit nga pamjet që u transmetuan drejtpërdrejt në televizionin “First Channel” në të ashtuquajturin reality show “I’ts My Home” ku shihet një mashkull duke goditur me këpucë në kokë një vajzë duke i shkaktuar lëndime fizike dhe shpirtërore. Menjëherë pas kësaj pati shumë reagime në opinionin publik ku kërkuan ndërhyrjen e policisë dhe mbylljen e këtij programi. Nuk vonoi shumë dhe Policia e Kosovës mori masa të menjëhershme duke shkuar në vendin e ngjarjes ku po transmetohet ky emision.
Dje Policia e Kosovës në një njoftim për media tha se pas intervistimit të disa dëshmitarëve dhe vet autorit dhe përfundimit të fazës fillestare të hetimit është udhëzuar nga prokurori i shtetit që të hap rast për veprat sulm dhe kanosje.
Sipas burimeve të KosovaNews brenda Policisë së Kosovës policia pas intervistimit e kishte mbajtur në stacion për disa orë të dyshuarin në pritje të urdhrit të prokurorisë, mirëpo për çudi prokurori kishte hezituar të lëshoj urdhër arrest ndaj sulmuesit me gjithë dëshmitë që i kishte parë i gjithë opinioni publik drejtpërdrejtë në video.
Kosovanews gjatë ditës së sotme i ka dërguar Prokurorisë Themelore pyetje për të mësuar arsyet se pse nuk ka lëshuar urdhër arrest për sulmuesin dhe rastin e ka proceduar në mënyrë të rregullt pa të arrestuar, mirëpo nuk kemi marrë përgjigje deri në momentin e publikimit të këtij artikulli.
Kujtojmë që jo më larg se javën e kaluar prokuroria kishte lëshuar urdhër arrest ndaj gjyshit 81 vjeçar Musli Rexhepi vetëm se ai e kishte kanosur më fjalë kryetarin e SBASHK-ut Rrahman Jasharin.
Prokuroria Themelore në Prishtinë madje kishte kërkuar 30 ditë paraburgim për gjyshin 81 vjeçar mirëpo kjo gjë ishte refuzuar nga Gjykata Themelore në Prishtinë dhe Musli Rexhepi ishte liruar.
