Të premten nga ora 12:00 do të organizohet një protestë para Gjykatës Themelore në Mitrovicë.
Përmes kësaj proteste, do të kërkohet trajtim i drejt dhe me prioritet i rastit të Betina Ymerit, e cila bëri vetëvrasje pas kërcënimeve nga i fejuari i saj.
Kjo është bërë e ditur nga njerëz të ndryshëm në rrjete sociale, të cilët kanë thënë se kjo protestë po organizohet me iniciaticë të prindërve të Betinës.
I fejuari i të ndjerës tashmë gjendet në paraburgim.
Lexoni edhe:
Postimi i plotë:
Të dashur/a qytetarë/e të Mitrovicës,
Me iniciativë të prindërve të Betina Ymerit e cila për shkak të kërcënimeve nga fejuari i saj përfundoi në vetëvrasje, të premtën organizojmë protestë nga ora 12:00 para Gjykatës Themelore në Mitrovicë.
Përmes protestës ne iu bëjmë thirrje institucioneve gjegjëse që ta trajtojnë drejt dhe me prioritet rastin e Betinës dhe t’i jap ndëshkim meritor personit që e shtyri drejt vdekjes atë. Dhuna sistematike të cilën e ka përjetuar Betina është një nga realitetet me të frikshme të cilën e jetojnë shumë vajza e gra në Kosovë, dhunë kjo e cila ushqehet nga të gjitha institucionet publike e private që vazhdojnë ta normalizojnë dhe amnistojnë dhunën me bazë gjinore.
Përveç kërkesave tona drejt institucioneve publike, prindërit e të ndjerës duan ta kthejnë vëmendjen tek nevoja për mbrojtje dhe vëmendje ndaj vajzave të tyre. Përderisa jetojmë në një sistem të dhunshëm si ky i yni, është vendimtare që të angazhohemi më shumë për sigurinë e vajzave, në mënyrë që ato të mos ndihen të vetmuara dhe pa ndihmë kur ato janë viktima të dhunës.
Ky sistem e kjo mendësi duhet të ndryshojë. Andaj, ne ngrihemi në këmbë të premtën për të kërkuar drejtësi për Betinën dhe siguri për të gjitha vajzat dhe gratë në Kosovë. Mos të dodhë më edhe një vetëvrasje, mos të tolerojmë më as edhe një kërcënim ndaj vajzave, mos të humbet as edhe një jetë më shumë.
