Pas dhunës së shfaqur në reality shou “It’s my home”, e cila është parë drejtpërdrejt në TV dhe tensioneve që janë krijuar aty ndaj një personi, në këtë rast ndaj një vajze, ka ndërhyrë KPM dhe ka ndërprerë transmetimin e këtij emisioni.
Është vetë organizatori i reality shou “It’s my home”, Valon Maloku që ka njoftuar se KPM ka ndërprerë transmetimin e tij.
Vendimi i KPM-së erdhi pas skenave të dhunshme të shfaqura dje mes pjesëmarrësve në “It’s my home”.
“Sipas vendimit te KPM-se programi Reality shou “It’s my home” nderprehet menjëherë ne transmetimin televiziv. “It’s my home” vazhdon te transmetohet ne kanalin tone ne youtube 24 ore me 7, deri ne nje vendim tjeter”, ka njoftuar Maloku në profilin e tij në Facebook.
Pas dhunës së shfaqur në reality shoo “It’s my home”, Policia e Kosovës dje ka hapur rast për veprat “sulm” dhe “kanosje”.
Lajmin për ndërhyrjen e policisë e ka konfirmuar zëdhënësja e Policisë për Rajonin e Prishtinës, Florie Ahmeti.
Ahmeti ka bërë me dije se janë intervistuar disa persona për rastin në fjalë.
“Lidhur me ngjarjen në fjalë, pas përfundimit të fazës fillestare të hetimit si dhe intervistimit të disa personave policia është udhëzuar nga prokurori i shtetit që të hap rast për veprat sulm dhe kanosje”, ka thënë Ahmeti.
