Policia e Kosovës njofton se është arrestuar një person, nën dyshimin se ka tentuar ta vrasë një tjetër të dielën mbrëma në fshatin Lutogllavë të Pejës.
Sipas asaj që është raportuar dje, një person thuhet se për qejf e thirri në shtëpinë e tij dhëndrin, por dyshohet se ka prerë në besë burrin e motrës së tij pasi e plagoi prapa shpinës të shtunën mbrëma.
Në raportin e sotëm 24 orësh të Policisë së Kosovës, thuhet se viktima ka pësuar lëndime, ndërsa ende nuk dihen motivet e rastit.
“Është arrestuar i dyshuari mashkull kosovar pasi që i njëjti për motive të panjohura ka shtënë me armë zjarri në drejtim të viktimës mashkull kosovar. Viktima ka pësuar lëndime dhe ka pranuar tretman mjekësor”, njofton policia.
Tutje thuhet se njësitet policore në vendin e ngjarjes dhe gjatë bastisjes në shtëpinë e të dyshuarit kanë gjetur e konfiskuar një pistoletë me karikator, një fishek dhe një gëzhojë cal-7.65 mm, dhe një pushkë automatike.
“Me vendim të prokurorit, i dyshuari pas intervistimit është dërguar në mbajtje. Rasti në proces hetimor”, njofton policia.
