Këshilli Qendror Grevist i SBASHK-ut, ka thënë se është duke u ushtruar presion ndaj kryetarit të sindikatës, Rrahman Jasharaj nëpër disa komuna, shkolla dhe çerdhe nga prindërit më fëmijët e tyre që të ndërpritet greva, raporton KosovaNews.
Këtë SBASHK-u e ka thënë përmes një komunikate për media, ku si presion quhet edhe vizita që kryeministri Albin Kurti ka bërë në shkollat e komunës së Podujevës.
Këshilli u ka bërë apel prindërve që të heqin dorë nga metoda e tentimit të thyerjes së grevës me presion ndaj grevistësve, sepse siç thuhet, ata nuk do të heqin dorë.
“Këshilli Qendror Grevist i SBASHK-ut, po përcjell në vazhdimësi tani e 13 ditë rrjedhën e grevës në institucionet arsimore ku ka vërejtur se ditët e fundit ka presione të vazhdueshme ndaj kryetarit të SBASHK-ut z.Jasharaj, duke u munduar ta shantazhojnë e etiketojnë me postime të rrejshme, pastaj përgatitja e tentim sulmit fizik gjatë vizitës së tij që u bëri grevistëve. Presionet janë të vazhdueshme edhe nëpër disa komuna, shkolla dhe çerdhe, si nga ana e Qeverisë – rasti i djeshëm i vizitës së Kryeministrit Kurti në Podujevë, ashtu edhe nga një numër i vogël i prindërve me fëmijët e tyre (nxënësit) që tentojnë ta thyejnë grevën”, thuhet nga SBASHK-u.
Tutje kjo sindikatë u ka bërë apel prindërve që tentuan me nxënës ta thyejnë grevën me presion ndaj grevistëve, që të heqin dorë nga kjo metodë, sepse në këtë formë në asnjë mënyrë greva nuk mund të ndërpritet.
“Presionin ta orientojnë drejt Qeverisë duke kërkuar zgjidhje për të filluar punën institucionet arsimore. Këshilli Qendror Grevist i SBASHK-ut është duke i përcjell me vëmendje dezinformatat nga kushdo qoftë, të cilat kanë qëllimin e vetëm përçarjen e anëtarësisë sonë. Të gjitha këto do ti paraqesim pranë organeve të drejtësisë”, thuhet në komunikatë.
Mes tjerash, SBASHK ka apeluar te organet e rendit dhe organet tjera që me vëmendje t’i përcjellin rastet si ai i djeshmi ndaj kryetarit Jasharaj dhe tentuesit e prishjes se rendit t’i vejmë para organeve të drejtësisë.
Por, ajo që është interesante dhe e pakuptueshme në këtë komunikatë është fakti se SBASHK-u i ka fajësuar nxënësit se po bëjnë dezinformata.
“ Po ashtu edhe nxitësit të cilët me dezinformata të ndryshme nxisin këto sulme”, thuhet në komunikatë./KosovaNews/
