Policia e Kosovës ka bërë të ditur të shtunën se ka arrestuar një person, nën dyshimin se përmes rrjetit social ka tentuar që ta bindë një person tjetër që ta ndërrojë deklaratën e tij në një proces gjyqësor.
Sipas policisë, bëhet fjalë për një proces gjyqësor për rastet “fajde”, “detyrim” dhe “kanosje”.
“Është arrestuar i dyshuari mashkull kosovar nën dyshimin se përmes rrjetit social ka kontaktuar të dëmtuarin mashkull kosovar duke tentuar që ta bindë që ta ndërrojë deklaratën e tij në procesin gjyqësor për rastin ‘fajde’, ‘detyrim’ dhe ’kanosje’”, thuhet në njoftim.
Si dëshmi për procedura të mëtutjeshme hetimore është sekuestruar një telefon.
“Me vendim të prokurorit të shtetit i dyshuari pas intervistimit është dërguar në mbajtje”, thuhet në njoftim.
