Policia e Kosovës, në bashkëpunim me Prokurorinë Speciale, ka arrestuar të dielën në Zveçan një person me inicialet I.M., nën dyshimet për përfshirje në disa vepra penale.
Sipas komunikatës së përbashkët të Policisë së Kosovës dhe Prokurorisë Speciale, arrestimi është kryer nga hetuesit e Drejtorisë për Hetimin e Krimit të Organizuar dhe Krimeve të Rënda, me urdhër të Prokurorisë Speciale.
I.M. dyshohet për veprat penale “Sulm ndaj personit zyrtar”, “Pjesëmarrja në turmë që kryen vepër penale dhe huliganizëm”, “Bashkim për veprimtari kundërkushtetuese” dhe “Rrezikim i personave nën mbrojtje ndërkombëtare”.
Sipas autoriteteve, i dyshuari është arrestuar pas ndërmarrjes së një sërë veprimesh hetimore. Ai dyshohet se ka qenë i përfshirë në sulmet ndaj pjesëtarëve të KFOR-it dhe Policisë së Kosovës gjatë majit të vitit 2023.
Policia e Kosovës dhe Prokuroria Speciale kanë bërë të ditur se do të ndërmarrin veprimet e nevojshme procedurale në përputhje me legjislacionin në fuqi dhe standardet ndërkombëtare.
Hetimet dhe procedurat ndaj të dyshuarit janë në vijim.
