Njësitë përkatëse të Policisë së Kosovës kanë gjetur të premten mbetje eshtërore të tre individëve në fshatin Kalludër të Zubin Potokut.
Sipas ekspertit mjeko-ligjor, mbetjet janë me prejardhje njerëzore dhe paraqesin interes forenzik. Autoritetet dyshojnë se ato mund t’u përkasin viktimave të luftës së fundit në Kosovë, njofton policia
Sipas policisë, rasti është regjistruar nën dyshimin për krime lufte kundër popullatës civile, ndërsa mbetjet pritet t’i nënshtrohen procedurave të mëtejshme forenzike për identifikimin dhe përcaktimin e rrethanave të vdekjes.
“Fsh. Kalludër, Zubin Potok / 19.04.1999 – NN. Me datën 14.08.2026 njësitë përkatëse policore kanë gjetur mbetjet eshtërore të tre (3) individëve, të cilat sipas ekspertit mjeko-ligjor janë me prejardhje njerëzore dhe janë me interes forenzik. Mbetjet eshtërore dyshohet që janë të viktimave të luftës së fundit në Kosovë”, thuhet në raportin 24-orësh të policisë.
Një hetim rreth dyvjeçar i autoriteteve të Kosovës çoi fillimisht në arrestimin e dy personave të dyshuar për krime lufte, dhe më pas në gërmime në një lokacion në Zubin Potok, ku dyshohej se ndodhej një varrezë masive.
Brenda ditësh, u zbuluan mbetje mortore me origjinë njerëzore, u arrestua edhe një i dyshuar tjetër për krime lufte, u identifikuan edhe lokacione tjera ku dyshohet se mund të ketë mbetje mortore.
