Ministri në detyrë i Punëve të Jashtme, Glauk Konjufca, ka reaguar pas deklaratave të presidentit ukrainas Volodymyr Zelensky në Beograd, ku ai riafirmoi mosnjohjen e Kosovës nga Ukraina, duke theksuar se Kosova ka qëndruar në mbështetje të Ukrainës që nga fillimi i agresionit rus dhe se do ta mirëpriste njohjen e Republikës së Kosovës nga Kievi.
Në një postim në platformën X, Konjufca tha se Kosova, që nga fillimi i agresionit rus ndaj Ukrainës, ka qëndruar në mbështetje të Kievit, pavarësisht se Ukraina nuk e njeh shtetin e Kosovës.
“Me keqardhje kemi pranuar deklaratat e presidentit Zelenskyy në Beograd, me të cilat ai riafirmoi mosnjohjen e Republikës së Kosovës nga Ukraina”, shkroi Konjufca.
Ai tha se Kosova ka dënuar pushtimin rus, është harmonizuar me politikën e jashtme dhe të sigurisë të Bashkimit Evropian, ka vendosur sanksione ndaj Rusisë dhe Bjellorusisë dhe ka ofruar ndihmë për Ukrainën.
“Këtë e bëmë pavarësisht mosnjohjes së shtetit tonë nga Ukraina, sepse solidariteti me një popull që mbron lirinë, sovranitetin dhe integritetin e tij territorial është çështje parimi”, shkroi ai.
Konjufca theksoi edhe dallimin mes qëndrimit të Kosovës dhe atij të Serbisë ndaj Rusisë.
“Është po aq e rëndësishme të rikujtohet një dallim i qartë: ndërsa Kosova ka vendosur sanksione ndaj Rusisë, Serbia nuk është harmonizuar me sanksionet e Bashkimit Evropian të vendosura si përgjigje ndaj luftës së agresionit të Rusisë kundër Ukrainës”, tha ai.
Ai shkroi se Republika e Kosovës është “shtet sovran dhe i pavarur”, ndërsa rikujtoi procesin që çoi deri te shpallja e pavarësisë më 17 shkurt 2008 dhe opinionin e Gjykatës Ndërkombëtare të Drejtësisë të vitit 2010.
Konjufca kundërshtoi edhe përpjekjet e Rusisë për ta përdorur Kosovën si precedent për veprimet e saj në Ukrainë.
“Pikërisht për këto arsye, përpjekjet e Rusisë për ta përdorur Kosovën si precedent ose si justifikim për pushtimin, okupimin apo përpjekjen për aneksimin e territorit ukrainas janë historikisht dhe juridikisht të rreme. Nuk ekziston asnjë paralele e tillë”, shkroi ai.
Në fund, Konjufca tha se Kosova vazhdon ta mbështesë sovranitetin dhe integritetin territorial të Ukrainës, por kundërshton paraqitjen e Kosovës përmes integritetit territorial të Serbisë.
“Ne do ta mirëprisnim njohjen e Republikës së Kosovës nga Ukraina. Një vendim i tillë do t’i forconte pikërisht parimet e lirisë, demokracisë dhe të drejtës ndërkombëtare, të cilat vetë Ukraina po i mbron sot”, shkroi Konjufca.
