Një OJQ e cila për shkak të hakmarrjes ka dashur të mbetet anonime ka publikuar një reagim me kërkesë për rishqyrtim lidhur me rezultatet e thirrjes publike të Drejtorisë së Mirëqenies Sociale të Komunës së Prishtinës për ndarjen e granteve për vitin 2026, ku ngrihen dyshime për përqendrimin e fondeve publike në tri organizata që pretendohet se kanë lidhje të ngushta organizative me ekosistemin e Kolegjit Heimerer.
Sipas reagimit, tri organizata – Fondacioni HiSpace, Instituti i Evropës Juglindore për Politika Shëndetësore dhe Sociale dhe Kosova Heimerer Kinder Haus – janë përfituese të një totali prej 40 mijë eurosh nga kjo thirrje publike. Autorët e reagimit theksojnë se publikimet dhe dokumentet publike tregojnë lidhje organizative dhe funksionale ndërmjet këtyre subjekteve dhe Kolegjit Heimerer, duke kërkuar që Komuna të verifikojë nëse këto organizata kanë funksionuar në mënyrë të pavarur gjatë procesit të aplikimit.
Në reagim e kësaj oragnizate e cila ka kërkuar nga kryetari i Prishtinës Përparim Rama dhe Komuna e Prishtinës të mos finalizojë kontratat derisa të përfundojë verifikimi i lidhjeve juridike, organizative, administrative dhe financiare ndërmjet këtyre organizatave. Gjithashtu kërkohet publikimi i certifikatave të regjistrimit, strukturave drejtuese, formularëve të vlerësimit, procesverbaleve të komisionit dhe deklaratave për shmangien e konfliktit të interesit.
Autorët e dokumentit theksojnë se lidhja me të njëjtin ekosistem institucional nuk përbën automatikisht shkelje, por argumentojnë se ekzistenca e këtyre lidhjeve publike është e mjaftueshme për të kërkuar një verifikim të plotë institucional përpara se grantet të bëhen përfundimtare. Ata shtojnë se shpërndarja e fondeve publike duhet të bazohet në konkurrencë të barabartë, transparencë dhe trajtim të paanshëm të të gjithë aplikuesve.
Në pjesën procedurale të reagimit përmendet edhe Rregullorja MF nr. 04/2017 për financimin publik të OJQ-ve, duke kërkuar sqarime nëse janë respektuar rregullat për shmangien e konfliktit të interesit dhe nëse përqendrimi i fondeve në këto tri organizata ka ndikuar në mundësitë e financimit për organizatat e tjera. Gjithashtu kërkohet transparencë edhe për rastet e organizatave të eliminuara nga procesi për shkak të vonesave në raportim.
Reagimi i drejtohet Kryetarit të Komunës së Prishtinës, Drejtorisë së Mirëqenies Sociale dhe Komisionit Vlerësues, me kërkesën që të zhvillohet një verifikim i plotë dhe të publikohet një vendim i arsyetuar përpara finalizimit të procedurës së ndarjes së granteve.
