Pesë prokurorë dhe 15 zyrtarë e staf mbështetës të komunitetit serb kanë tërhequr dorëheqjet që i kishin ofruar në vitin 2022 në Prokurorinë Themelore në Mitrovicë.
Këtë e ka konfirmuar për “Betimi për Drejtësi” kryesuesi i Këshillit Prokurorial të Kosovës (KPK), Arian Gashi, i cili ka bërë të ditur se institucioni ka pranuar rreth 20 njoftime për tërheqjen e dorëheqjeve.
“KPK së fundi ka pranuar në vazhdimësi disa emaila (rreth 20 sosh) dërguar në adresën zyrtare të kryesuesit të KPK-së nga prokurorë dhe staf mbështetës të komunitetit serb të Prokurorisë Themelore në Mitrovicë, me të cilat të njëjtit e kanë informuar kryesuesin lidhur me njoftimet e tyre për tërheqjet e dorëheqjeve të paralajmëruara më herët”, ka deklaruar Gashi.
Sipas listës së siguruar, dorëheqjet i kanë tërhequr prokurorët Jagodinka Nikolić, Radica Milić, Nataša Radović, Danijela Batković dhe Bogdan Spadijer.
Ndërsa nga stafi administrativ dhe mbështetës dorëheqjet i kanë tërhequr Dejan Delibašić, Milica Smigić, Aleksandar Marković, Radica Božović, Suzana Brajković, Saša Trpković, Dejan Hrkalović, Dejan Stojsavljević, Draginja Sofronijević, Aleksandar Miletić, Petar Jeremić, Danijela Arsić, Biljana Pelević, Milenko Radenković dhe Gordana Mitrović.
KPK ka njoftuar se kjo çështje do të diskutohet dhe trajtohet në një nga takimet e ardhshme të Këshillit.
Gjithashtu , dorëheqjet i kanë tërhequr edhe gjyqtarë dhe staf mbështetës të komunitetit serb brenda sistemit gjyqësor.
Këshilli Gjyqësor i Kosovës ka pranuar disa kërkesa por ende nuk kanë numër të saktë.Ashtu sikurse kërkesat e dorëheqjes, edhe ato të rikthimit ende nuk janë trajtuar nga Këshilli Gjyqësor i Kosovës.Më 05.11.2022, në një mbledhje në Mitrovicë të Veriut, të ftuar nga Lista Serbe, në të cilën morën pjesë zyrtarë të lartë shtetërorë nga komuniteti serb, u njoftua largimi i tyre nga institucionet, përfshirë nivelin qendror ekzekutiv, lokal dhe nga gjyqësori.
