Fermerët e prodhimit të qumështit kanë protestuar para Ministrisë së Bujqësisë në Prishtinë, duke kërkuar rifillimin urgjent të grumbullimit të qumështit, i cili, sipas tyre, është ndërprerë tash e katër ditë pas mbylljes së përkohshme të qumështores Vita.
Me pankarta si “Mos na lini pa bukë”, “Mos prekni vendet e punës” dhe “Mos e dobësoni industrinë vendore”, protestuesit thanë se janë në një situatë të rëndë ekonomike dhe se nuk kanë ku ta dorëzojnë qumështin.
Përfaqësuesi i Shoqatës së Qumështarëve, Fidan Krasniqi, deklaroi se prej një viti kanë kërkuar nga institucionet masa për mbrojtjen e prodhimit vendor dhe konkurrencë të barabartë ndaj importeve të subvencionuara nga vendet e rajonit.
Ai theksoi se shumë fermerë janë të zhytur në kredi dhe paralajmëroi se situata është e papërballueshme, duke shtuar se “lopët nuk janë çezme” dhe prodhimi i qumështit nuk mund të ndalet.
Fermerët kërkuan që të rifillojë menjëherë grumbullimi i qumështit, si dhe që Qeveria të marrë masa ndaj importeve që, sipas tyre, po dëmtojnë prodhuesit vendorë.
Gjatë protestës, ministri në detyrë i Bujqësisë, Armend Muja, ftoi përfaqësuesit e qumështarëve në një takim në ministri. Ftesa u përcoll nga këshilltari i tij, Venhar Isufi, i cili u kërkoi protestuesve të paraqiten në zyrën e ministrit brenda 10 minutave.
