Strategjia e re do të fokusohet në edukimin e hershëm, shkollën gjithëditore, arsimin profesional dhe reformimin e arsimit të lartë.
Ministria e Arsimit dhe Shkencës (MASh) ka nisur zyrtarisht procesin e hartimit të Strategjisë së Arsimit të Kosovës 2035+, duke organizuar tryezën e parë të diskutimit me partnerët zhvillimorë të sektorit të arsimit.
Qëllimi i takimit ishte prezantimi i qasjes metodologjike dhe procesit të hartimit të strategjisë së re, e cila do të përcaktojë prioritetet që do të udhëheqin zhvillimin e sistemit arsimor në dekadën e ardhshme.
Ministri në detyrë i Arsimit dhe Shkencës, Hajrulla Çeku, falënderoi partnerët zhvillimorë për mbështetjen e vazhdueshme në avancimin e arsimit në Kosovë, duke theksuar se rezultatet e deritanishme janë edhe fryt i bashkëpunimit shumëvjeçar me ta.
Ai bëri të ditur se Strategjia e Arsimit 2035+ do të hartohet përmes një procesi gjithëpërfshirës dhe konsultativ, me pjesëmarrjen e institucioneve, ekspertëve, organizatave të shoqërisë civile, nivelit lokal dhe akterëve të tjerë relevantë.
Sipas Çekut, strategjia do të mbështetet në katër prioritete kryesore: edukimin dhe parandalimin e hershëm, përmirësimin e arsimit parauniversitar përmes zhvillimit të shkollës gjithëditore, fuqizimin e arsimit dhe aftësimit profesional në funksion të tregut të punës, si dhe ristrukturimin e arsimit të lartë.
Koordinatori i procesit, Taulant Hoxha, prezantoi kornizën metodologjike, strukturën menaxhuese dhe afatet kryesore të hartimit të dokumentit. Ai theksoi se Strategjia e Arsimit 2022–2026 ka krijuar bazën për avancimin e reformave në sektor, ndërsa dokumenti i ri synon të ndërtojë mbi arritjet ekzistuese dhe të krijojë një kornizë afatgjatë që i përgjigjet nevojave të shoqërisë dhe sfidave të së ardhmes.
Në tryezë morën pjesë përfaqësues të Bashkimit Evropian, Bankës Botërore, GIZ-it, ADA-së, LuxDev-it, OSBE-së, UNDP-së, UNICEF-it, UNOPS-it, Millennium Challenge Account (MCA), DVV-së, si dhe projekteve KosEd dhe Swisscontact.
Sipas MASh-it, të gjithë partnerët zhvillimorë shprehën gatishmërinë për të vazhduar mbështetjen gjatë procesit të hartimit dhe zbatimit të Strategjisë së Arsimit 2035+, duke vlerësuar rëndësinë e konsultimeve të gjera dhe koordinimit institucional për ndërtimin e një sistemi arsimor më cilësor, gjithëpërfshirës, të qëndrueshëm dhe konkurrues.
Tryeza e së martës shënoi fillimin zyrtar të procesit të përgatitjes së Strategjisë së Arsimit 2035+ dhe është e para nga një seri diskutimesh që do të zhvillohen me institucione, ekspertë, hisedarë dhe palë të tjera të interesuara në fushën e arsimit.
