Një grua është gjobitur me 300 euro nga Policia e Kosovës pasi dyshohet se kishte lënë fëmijët e saj të mbyllur në një veturë të parkuar në një qendër tregtare në Prizren, në kushte të temperaturave të larta.
Sipas njoftimit të Policisë, rasti ka ndodhur më 27 qershor, rreth orës 17:50, kur autoritetet kanë pranuar një informacion se disa fëmijë ndodheshin të mbyllur në një automjet dhe ishin të rraskapitur nga i nxehti, transmeton lajmi.net.
Policia ka reaguar menjëherë, duke mbërritur në vendin e ngjarjes dhe duke hapur veturën me ndihmën e një shufre metalike.
Sipas policisë, fëmijët ishin të lodhur dhe të dehidratuar si pasojë e temperaturave të larta. Në ndërkohë, në vendngjarje është paraqitur edhe nëna e tyre.
Për shkak të moskujdesit ndaj të miturve, policia i ka shqiptuar asaj një gjobë prej 300 eurosh për kundërvajtjen “Moskujdes ndaj të miturit”.
Policia e Kosovës ka shfrytëzuar rastin për t’u bërë apel qytetarëve që, gjatë ditëve me temperatura të larta, të tregojnë kujdes të shtuar, veçanërisht ndaj fëmijëve, të moshuarve dhe personave me probleme shëndetësore.
“Në asnjë rast nuk duhet të lihen fëmijët të mbyllur në automjet, pasi pasojat mund të jenë fatale”, thuhet në apelin e Policisë.
Njoftimi i plotë:
I lë fëmijët mbyllur në veturë, e ëma gjobitet me 300 euro në Prizren
Prizren, 30 qershor 2026
Më datë 27.06.2026, rreth orës 17:50, Policia ka pranuar informacion se në një veturë të parkuar në një qendër tregtare në Prizren ndodheshin disa fëmijë të mbyllur brenda, të rraskapitur nga i nxehti, duke qenë se temperaturat ishin shumë të larta.
Policia ka arritur menjëherë në vendngjarje dhe me ndihmën e shufrës metalike ka hapur automjetin. Fëmijët ishin të lodhur dhe të dehidratuar nga nxehtësia. Në ndërkohë, në vendngjarje është paraqitur edhe e ëma e tyre. Për shkak të moskujdesit ndaj të fëmijëve, policia i ka shqiptuar gjobë prej 300 euro, sipas kundërvajtjes “Moskujdes ndaj të miturit”.
Duke marrë parasysh se tani në stinën e verës temperaturat janë shumë të larta, Policia apelon për kujdes të shtuar, sidomos ndaj fëmijëve, të moshuarve dhe personave të sëmurë. Në asnjë rast nuk duhet të lihen fëmijët të mbyllur në automjet, pasi pasojat mund të jenë fatale.
