Pesë persona janë arrestuar të martën gjatë një operacioni të gjerë policor të koduar “White Star”, i cili u zhvillua në disa lokacione në Kosovë në kuadër të hetimeve për krim të organizuar, trafikim të narkotikëve dhe pastrim parash.
Sipas një komunikate të përbashkët të Prokurorisë Speciale të Republikës së Kosovës dhe Policisë së Kosovës, aksioni është realizuar në Prishtinë, Pejë, Prizren, Viti dhe Drenas, nën monitorimin e Prokurorisë Speciale dhe me urdhër të Gjykatës Themelore.
Pesë të dyshuarit janë ndaluar për 48 orë me vendim të prokurorit special, nën dyshimin për përfshirje në veprat penale të pjesëmarrjes ose organizimit të grupit kriminal të organizuar, blerjes, posedimit, shpërndarjes dhe shitjes së paautorizuar të narkotikëve, si dhe pastrimit të parave.
Gjatë kontrollit të lokacioneve, autoritetet kanë sekuestruar një numër të konsiderueshëm provash dhe pasurish, përfshirë:
6 armë;
5 karikatorë;
9.67 gramë kokainë;
35.18 gramë fara të marihuanës;
239 fishekë;
25 telefona mobilë;
7,595 euro para të gatshme;
10 automjete dhe një motoçikletë;
10 kompjuterë;
13 USB dhe një DVR;
16 ora dore.
Operacioni është mbështetur nga Europol, si dhe nga autoritetet e Belgjika, Franca dhe Holanda. Përfaqësues të këtyre institucioneve, së bashku me prokurorin e rastit, kanë monitoruar operacionin nga afër.
Prokuroria Speciale dhe Policia e Kosovës kanë theksuar se mbeten të përkushtuara në luftimin e krimit të organizuar dhe forcimin e sundimit të ligjit, duke vazhduar me veprime të koordinuara për parandalimin, hetimin dhe ndjekjen e veprave penale
