Ministrja e Arsimit, Arbërie Nagavci, dhe sekretari i përgjithshëm i Shoqatës Evropiane e Instituteve për Aftësimin Profesional (EVBB), Theodor Grassos, nënshkruan memorandum bashkëpunimi për përmirësimin e imazhit të institucionet e Arsimit dhe Aftësimit Profesional (AAP) në Kosovë.
Nagavci tha se qëllimi i memorandumit është ndërmarrja e nismave të cilat do të rrisin rëndësinë e arsimit profesional, duke e bërë zgjedhjen primare për të rinjtë.
Ajo theksoi se memorandumi mundëson prezantimin e metodologjive dhe praktikat e aplikuara në vendet e treta evropiane apo joevropiane, organizimin e punëtorive e seminareve, ofrimin e ekspertizës dhe fuqizimin e institucioneve të Arsimit dhe Aftësimit Profesional.
E para e arsimit foli edhe për implementimin e mësimit dual nga 1 shtatori në katër profile, kuzhinier, asistent i restorantit, floktar dhe murator, duke thënë se ofrimi i një modeli të ri të mësimit do të jetë përparësi për shkollat dhe do të shtojë interesimin e nxënësve për regjistrim në këto drejtime.
Ndryshe, EVBB është shoqatë ombrellë evropiane e ofruesve të Arsimit dhe Trajnimit Profesional (VET). Objektivi i saj është përmirësimi cilësor i arsimit dhe trajnimit profesional në Evropë dhe më gjerë, si dhe rritja e përpjekjeve të synuara për të promovuar AAP-në si zgjedhje e parë.
