Ministri i Bujqësisë, Pylltarisë dhe Zhvillimit Rural, Armend Muja, ka njoftuar se ka nënshkruar Udhëzimin Administrativ për Pagesat Direkte – Subvencionet 2026, duke i hapur rrugë fillimit të procedurave për mbështetjen financiare të fermerëve në Kosovë.
Sipas Mujës, me këtë udhëzim obligohet Agjencia për Zhvillimin e Bujqësisë që të hapë thirrjen për aplikim në skemat e pagesave direkte, ndërsa pagesat do të realizohen pas procesit të verifikimit dhe brenda afateve të përcaktuara.
Ai ka bërë të ditur se paketa e subvencioneve për vitin 2026 sjell rritje të mbështetjes për disa sektorë të rëndësishëm të bujqësisë. Ndër risitë kryesore janë rritja prej 30 për qind për sipërfaqet e mbjella me perime në fushë të hapur dhe në serra, si dhe për sipërfaqet e mbjella me pemë.
Po ashtu, rritje prej 20 për qind do të ketë për pagesat e grurit me rendiment të lartë, për sipërfaqet e mbjella me mjedra, patate dhe fasule, si dhe për mbështetjen e mëshqerrave për riprodhim dhe viçave për majmëri. Ndërkohë, për vreshtat është paraparë një rritje prej 10 për qind.
Sipas udhëzimit të ri, fermerët do të përfitojnë edhe subvencion prej 7 centësh për litër qumësht, 100 euro shtesë për kultivimin e hektarit të parë, 100 euro për hektar për plehun artificial dhe 54 euro për hektar për naftën.
Një masë e veçantë është edhe mbështetja prej 500 eurosh për të rinjtë e moshës 18 deri në 29 vjeç, të cilët regjistrohen për herë të parë në skemat e pagesave direkte.
Muja ka theksuar se të gjitha kulturat tjera bujqësore do të vazhdojnë të mbështeten sipas nivelit të vitit të kaluar.
Ai ka bërë të ditur gjithashtu se Udhëzimi Administrativ është konceptuar si një kornizë afatgjatë, në përputhje me praktikat e Bashkimit Evropian, me qëllim që thirrjet për aplikim të hapen me kohë dhe të harmonizohen me kalendarin e punëve bujqësore, duke u mundësuar fermerëve planifikim më të mirë të prodhimit dhe investimeve.
