Kandidati i PDK-së për deputet, Qëndrim Kryeziu, është arrestuar sot nga Policia e Kosovës, pasi hyri në zonën ku po zhvillohen punimet për rrënimin e ish-pompës së derivateve “Patroni”, hapësirë në të cilën pritet të ndërtohet objekti i ri i Ministrisë së Bujqësisë, Pylltarisë dhe Zhvillimit Rural.

Sipas pamjeve të publikuara nga KosovaNews, Kryeziu kishte shkuar në vendngjarje për të penguar procesin e rrënimit, ndërsa më pas ka kundërshtuar urdhrat e zyrtarëve policorë për t’u larguar nga zona, gjë ka çuar në arrestimin e tij.

Në vendin e ngjarjes, Kryeziu deklaroi se objektet që po rrënohen janë pronë e dajës së tij dhe se, sipas tij, procesi po zhvillohet pa vendim të gjykatës.

Ndërkohë, Ministria e Bujqësisë sot ka nisur zyrtarisht punimet në kuadër të projektit “Rrënimi i objekteve ku do të ndërtohet objekti i Ministrisë së Bujqësisë, Pylltarisë dhe Zhvillimit Rural”.

Punimet nga afër i ka përcjellë ministri i Bujqësisë, Armend Muja, i cili u pa në terren me jelek dhe kapelë pune, duke mbikëqyrur procesin e rrënimit.

Sipas ministrisë, projekti synon krijimin e kushteve moderne dhe funksionale për institucionin, me qëllim përmirësimin e shërbimeve dhe rritjen e efikasitetit në sektorin e bujqësisë dhe zhvillimit rural./KosovaNews/