Një person ka humbur jetën si pasojë e një aksidenti trafiku që ka ndodhur, në Gjilan.
Sipas raportit 24-orësh të Policisë së Kosovës, aksidenti ka ndodhur më 28 maj, rreth orës 08:25 dhe në të janë përfshirë dy vetura me targa vendore, të drejtuara nga dy meshkuj kosovarë.
Si pasojë e përplasjes, drejtuesi i njërës veturë ka pësuar lëndime të rënda trupore. Ai fillimisht është dërguar për trajtim në qendrën emergjente në Gjilan, por nuk ka arritur t’u mbijetojë plagëve dhe ka ndërruar jetë.
Me urdhër të prokurorit, trupi i pajetë i viktimës është dërguar në Institutin e Mjekësisë Ligjore për obduksion.
Ndërkohë, shoferi tjetër, i cili dyshohet se ka shkaktuar aksidentin, ka pësuar lëndime të lehta trupore. Pas trajtimit mjekësor, ai është arrestuar me vendim të prokurorit dhe është dërguar në mbajtje.
Policia ka bërë të ditur se hetimet për zbardhjen e plotë të rrethanave të aksidentit po vazhdojnë.
