Presidenti rus, Vladimir Putin, ka premtuar hakmarrje ndaj Ukrainës pasi akuzoi Kievin për një sulm vdekjeprurës ndaj një konvikti studentor në një zonë të pushtuar të Ukrainës lindore.
Sipas autoriteteve të mbështetura nga Moska, sulmi ndodhi gjatë natës në qytetin Starobilsk, në rajonin e Luhanskut, ku humbën jetën 10 persona dhe u plagosën 48 të tjerë, ndërsa 11 persona rezultojnë ende të zhdukur. Ushtria ukrainase deklaroi se kishte goditur selinë e njësisë elitare ruse të dronëve “Rubicon” në Starobilsk, por nuk sqaroi nëse objekti i goditur ishte i njëjti me ndërtesën për të cilën Rusia pretendon se ishte konvikt studentor.
Duke folur nga Moska, Putin tha se në zonën përreth “nuk kishte objekte ushtarake apo shërbime të inteligjencës”, duke hedhur poshtë pretendimet se shpërthimi mund të ishte shkaktuar nga sistemet ruse të mbrojtjes ajrore apo luftës elektronike. Ai bëri të ditur se sulmi ishte kryer në tre valë me gjithsej 16 dronë dhe urdhëroi ushtrinë ruse të përgatisë “propozime” për kundërpërgjigje.
Ushtria Ukrainase deklaroi se njësia “Rubicon” ka kryer vazhdimisht sulme ndaj civilëve dhe infrastrukturës civile në Ukrainë. Në deklaratë thuhej se forcat ukrainase po godasin vetëm objektiva ushtarake duke respektuar normat e së drejtës ndërkombëtare humanitare dhe ligjet e luftës.
Një ditë më parë, presidenti ukrainas, Volodymyr Zelensky, deklaroi se selia e shërbimit rus të sigurisë FSB në rajonin e pushtuar të Khersonit ishte goditur nga forcat ukrainase, duke shtuar se rreth 100 ushtarë rusë u vranë ose u plagosën.
Që nga nisja e pushtimit rus në vitin 2022, Ukraina ka akuzuar vazhdimisht Rusinë për sulme të qëllimshme ndaj civilëve, akuza që Moska i mohon rregullisht. Javën e kaluar, autoritetet ukrainase njoftuan se 24 persona, mes tyre tre vajza të mitura, u vranë pasi një raketë ruse goditi një ndërtesë banimi shumëkatëshe në kryeqytetin Kiev.
