Presidenti rus Vladimir Putin ka premtuar hakmarrje pasi akuzoi Ukrainën për kryerjen e një sulmi vdekjeprurës ndaj një konvikti studentor në një pjesë të pushtuar të Ukrainës lindore.
Dhjetë persona u vranë dhe 38 të tjerë u plagosën nga sulmi i natës në qytetin Starobilsk, në rajonin e Luhanskut, tha guvernatori lokal i mbështetur nga Rusia. Sipas tij, edhe 11 persona të tjerë mbeten të zhdukur.
Ushtria ukrainase tha se kishte goditur selinë e njësisë elitare ruse të dronëve “Rubicon” në Starobilsk. Megjithatë, ajo nuk specifikoi nëse bëhej fjalë për të njëjtën ndërtesë që Rusia identifikoi si objektivin e sulmit, raporton BBC.
Por, Putin deklaroi se “nuk kishte objekte ushtarake, objekte të shërbimeve sekrete apo shërbime të lidhura me to në afërsi”.
“Prandaj, nuk ka absolutisht asnjë bazë për të pretenduar se municionet goditën ndërtesën si rezultat i sistemeve tona të mbrojtjes ajrore ose luftës elektronike”, tha ai gjatë një pritjeje në rezidencën e tij në Kremlin, në Moskë, të premten.
Ai urdhëroi ushtrinë ruse të përgatisë “propozime” për mënyrën se si duhet të hakmerret.
Lideri rus tha se sulmi ukrainas ishte kryer në tri valë, duke përdorur 16 dronë.
Televizioni shtetëror rus transmetoi pamje të asaj që e identifikoi si një nga studentet e plagosura, Diana Shovkun, 19 vjeçe.
