Presidenti rus, Vladimir Putin, ka nisur të martën vizitën e tij në Kinë. Ai pritet të takohet me udhëheqësin kinez, Xi Jinping, më pak se një javë pasi presidenti i SHBA-së, Donald Trump, përfundoi udhëtimin e tij në Pekin.
Vizita e Putinit në Kinë vjen ndërsa Pekini kërkon të ruajë marrëdhënie të qëndrueshme me Shtetet e Bashkuara, duke ruajtur gjithashtu lidhje të forta me Rusinë.
Kremlini ka thënë se Putini dhe Xi planifikojnë të diskutojnë bashkëpunimin ekonomik midis dy vendeve, por edhe “çështje kyç ndërkombëtare dhe rajonale”.
Kina është partnere kryesore tregtare për Rusinë, veçanërisht pas pushtimit të plotë të Ukrainës nga Moska në vitin 2022.
Pekini ka thënë se është neutral në konflikt, ndërsa ruan lidhjet tregtare me Kremlinin pavarësisht sanksioneve ekonomike dhe financiare nga SHBA-ja dhe Evropa.
