Komisioni Qendror i Zgjedhjeve (KQZ) ka mbajtur mbledhjen e 51-të ku u prezantua raporti për përfundimin e dy periudhave për ndryshimet e të dhënave të votuesve: ndërrimi i qendrës së votimit brenda komunave dhe regjistrimi i votuesve jashtë Kosovës.
Sipas KQZ-së, janë pranuar 11,840 kërkesa për ndërrim të qendrës së votimit, prej të cilave 11,276 janë aprovuar dhe 564 janë refuzuar. Ndërsa për votuesit jashtë Kosovës janë pranuar 142,803 kërkesa, prej të cilave 131,800 janë aprovuar, 10,907 janë refuzuar dhe 96 janë anuluar.
Po ashtu, KQZ miratoi dizajnin dhe përmbajtjen e fletëvotimit dhe broshurës për zgjedhjet e parakohshme për Kuvendin e Kosovës, që do të mbahen më 7 qershor 2026. Fletëvotimi përmban 21 subjekte politike.
U bë e ditur se votimi në përfaqësi diplomatike do të mbahet më 6 qershor, ndërsa në Kosovë më 7 qershor. Në disa komuna do të përdoren edhe gjuhët e komuniteteve, në përputhje me Ligjin për Përdorimin e Gjuhëve.
KQZ gjithashtu miratoi adresat e kutive postare për votimin me postë nga diaspora, i cili do të zhvillohet nga 25 maji deri më 6 qershor, në 22 shtete të botës.
Në këtë mbledhje u miratua edhe plani operacional i sigurisë për zgjedhjet, programi i trajnimeve për stafin zgjedhor, si dhe disa raporte financiare dhe vendime për mëditjet e stafit të angazhuar në proces.
