Deputeti i Vetëvendosjes, Mefail Bajqinovci, përmes një postimi në profilin e tij Facebook, i është drejtuar opozitës me një thirrje të drejtpërdrejtë për përgjegjësi politike dhe veprim konkret në funksion të zhbllokimit institucional.
Ai ka theksuar se vendi nuk duhet të shtyhet drejt zgjedhjeve të reja për shkak të, siç i quan ai, “kalkulimeve të ngushta politike”, duke kërkuar që të respektohet verdikti i qytetarëve tashmë i dhënë në zgjedhje.
Në reagimin e tij, Bajqinovci nënvizon se pritja për propozime konkrete nga opozita po zgjatet pa nevojë, ndërsa kërkesa mbetet e qartë: tre emra mbipartiak që mund të shërbejnë si zgjidhje për situatën aktuale.
“Ende jemi në pritje të tre emrave mbipartiak. Mos e shtyni vendin drejt zgjedhjeve për kalkulime të ngushta politike. Verdikti i qytetarëve tashmë është dhënë dhe duhet respektuar. Presim tre emra konkretë, jo arsyetime të pafundme,” ka shkruar ai.
Deputeti ka bërë thirrje për maturi dhe përgjegjësi institucionale, duke theksuar se momenti aktual kërkon bashkëpunim dhe jo bllokadë politike.
