Ministri i Ministrisë për Punë, Familje dhe Vlerat e Luftës Çlirimtare, Andin Hoti, ka zhvilluar një takim me përfaqësuesit e Shoqatës së Ndërtuesve të Kosovës, ku në fokus ishte zbatimi i legjislacionit dhe përmirësimi i sigurisë në punë.
Në këtë takim, ku mori pjesë edhe ushtruesi i detyrës së drejtorit ekzekutiv të Inspektoratit Qendror të Punës, Kastriot Jashari, u theksua se respektimi i ligjeve në fuqi mbetet prioritet i padiskutueshëm. Institucionet u zotuan për rritjen e bashkëpunimit me punëdhënësit dhe punëtorët, me synim garantimin e përmbushjes së obligimeve ligjore.
Hoti nënvizoi përkushtimin për forcimin e partneritetit me komunitetin e biznesit, duke bërë të ditur se ministria është në proces të themelimit të Këshillit Nacional për Sigurinë dhe Shëndetin në Punë. Ky mekanizëm synon të fuqizojë sistemin kombëtar në këtë fushë përmes përfshirjes së institucioneve dhe ekspertëve përkatës.
Nga ana tjetër, përfaqësuesit e Shoqatës së Ndërtuesve paraqitën sfidat dhe shqetësimet me të cilat përballet sektori, duke kërkuar zgjidhje përmes mekanizmave institucionalë.
Gjatë takimit u bë e ditur gjithashtu se së shpejti pritet të nisë një fushatë sensibilizuese për sigurinë në punë dhe zbatimin e legjislacionit, e cila synon përmirësimin e praktikave dhe lehtësimin e proceseve gjatë inspektimeve.
Në përfundim, palët vlerësuan se siguria dhe kushtet e punës janë interes i përbashkët, duke theksuar rëndësinë e forcimit të bashkëpunimit ndërinstitucional dhe ndërtimit të një klime të qëndrueshme mirëbesimi.
