E ardhur nga Kanadaja, për Samitin e Diasporës, shkrimtarja Margarita Syziu, ngriti shqetësimin e gjyqit ndaj ish krerëve të UÇK në Hagë.
“Unë kam një shqetësim shumë të madh, z. zv/kryeministër i Kosovës ne duhet të luftojmë kundër harresës. Atje në Hagë nuk janë vetëm ata burra po është në pikëpyetje lufta e drejtë që bëri populli i Kosovës dhe gjithë Shqipërisë dhe në pikëpyetje gjenocidi që u ushtrua ndaj popullsisë së Kosovës. Unë kam ardhur nga Kanadaja e largët ndaj do ma kushtoni një 5 minutësh për t’ju nderuar ju dhe luftën e Kosovës kundër harresës”, tha ajo ndërsa në vijim lexoi vargjet e saj kushtuar Kosovës.
Të gjakosur janë muret e gurta
Rrugët të gjakosura janë
Dhe strehët gjak pikojnë
Edhe plisat kur i çanë
Vetëm gjak kullojnë
Edhe zemrat plasur janë
Është gjak që nuk fshihet
Nuk ikën, rri aty pa u tharë
Trarët e vjetër rënkojnë
Është gjak i pamarrë
Kosovë
Ti gjak nëpër ëndrra sheh
Gjumi të është kthyer në makth
Shumë gjak i pafajshëm u derdh
Është aty, nuk ikën kollaj
Je dhimbje Kosovë
Je dhimbje e gjallë
Je dhimbje e mbytur në lot
Je dhimbje e larë në gjak
E trarët e vjetër rënkojnë
