Prokuroria Themelore në Ferizaj ka njoftuar se, me vendim të Prokurorit të Shtetit, është ndaluar për 48 orë një person i dyshuar me iniciale N.E., për shkak të dyshimit se ka kryer veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.
Rasti ka ndodhur në rrugën “Remzi Hoxha” në Ferizaj, ku një person ka rënë nga një objekt në ndërtim. Pas daljes në vendin e ngjarjes, ekipet emergjente kanë konstatuar vdekjen e viktimës.
Prokurori i shtetit ka udhëzuar Policinë dhe Inspektoratin e Punës që të ndërmarrin të gjitha veprimet e nevojshme hetimore për zbardhjen e plotë të rrethanave të këtij rasti.
Ndërkohë, me urdhër të prokurorit, trupi i pajetë i viktimës është dërguar për obduksion në Institutin e Mjekësisë Ligjore në Prishtinë.
